Astrologjia kthehet në trend mode për Gen Z, shenjat e horoskopit si deklaratë stili

Astrologjia nuk është më vetëm një kuriozitet apo rubrikë horoskopi, për Gjeneratën Z, ajo po shndërrohet në një formë identiteti dhe shprehjeje personale, madje edhe në një trend të mirëfilltë mode.

Lexo gjithashtu: Çfarë duhet të dini para se të vizitoni Walt Disney World?

Në rrjetet sociale, është bërë e zakonshme që të rinjtë të përfshijnë shenjën e tyre astrologjike, si Dashi apo Bricjapi, në bio apo përmbajtje, duke e përdorur si një mënyrë të thjeshtë për të treguar se kush janë. Sipas Laurent François, autor i “Alive in Social Media”, astrologjia është tashmë një pjesë e rëndësishme e kulturës digjitale dhe ndikon në mënyrën si të rinjtë prezantojnë veten.

Kjo prirje është përforcuar edhe nga platformat si Co-Star dhe komunitete si #witchtok në TikTok, ku miliona përdorues ndajnë përmbajtje të lidhur me horoskopin dhe mistikën.

Nga rrjetet sociale në pasarelë

Ndikimi i astrologjisë nuk mbetet vetëm në botën digjitale. Ai po reflektohet gjithnjë e më shumë edhe në modë, veçanërisht në rikthimin e bizhuterive me temë zodiaku.

Shtëpia e njohur Van Cleef & Arpels po rikthen koleksionin e saj “Zodiaque”, me medalione, varëse dhe byzylykë të frymëzuar nga shenjat astrologjike. Koleksioni, që daton që nga fillimi i shekullit të 20-të dhe u bë veçanërisht popullor në vitet ’70, po rilansohet me çmime më të përballueshme për të tërhequr një brez të ri klientësh.

Versionet e reja përfshijnë medalione në ar të verdhë dhe të bardhë, me çmime që nisin nga rreth 2,740 dollarë, duke e bërë këtë trend më të aksesueshëm për publikun e ri.

Një identitet që vishet

Për Gen Z, astrologjia nuk është më thjesht besim apo argëtim, është një mënyrë për të komunikuar personalitetin, përkatësinë dhe stilin. Nga bio-t në rrjetet sociale te aksesorët që mbajnë çdo ditë, shenjat e zodiakut po kthehen në një “gjuhë” të re të modës dhe vetë-shprehjes.