Sistemi operativ Android do të fillojë të rinisë automatikisht pajisjet që qëndrojnë të kyçura për tre ditë radhazi.Të hënën, kompania Google publikoi një përditësim të ri për Google Play Services – një komponent thelbësor i sistemit Android që ofron funksionalitete për aplikacionet dhe vetë sistemin operativ. Në seksionin “Security & Privacy” është shtuar një funksion i ri sigurie, ku thuhet: “Pajisja do të riniset automatikisht nëse qëndron e kyçur për 3 ditë rresht.”
Një funksion i ngjashëm u prezantua vitin e kaluar edhe nga Apple për sistemin iOS. Qëllimi i kësaj mase është të vështirësohet puna e atyre që përpiqen të zhbllokojnë apo të nxjerrin të dhëna nga një pajisje e kyçur, siç ndodh, për shembull, kur autoritetet përdorin pajisje analizash forenzike si ato të prodhuara nga Cellebrite apo Magnet Forensics.
Kur një telefon është i fikur ose nuk është zhbllokuar që pas ndezjes, një pjesë e të dhënave mbetet plotësisht e enkriptuar dhe shumë më e vështirë për t’u aksesuar pa kodin personal të përdoruesit. Ky quhet statusi “Before First Unlock”. Pasi pajisja të jetë zhbllokuar, disa prej këtyre të dhënave dekriptohen dhe mund të bëhen të aksesueshme, qoftë përmes metodave si brute force, qoftë përmes dobësive të mundshme të sigurisë – mënyra që zakonisht përdorin pajisjet forenzike të ligjzbatimit. Kjo gjendje njihet si “After First Unlock”.
Google nuk ka dhënë ende një koment zyrtar mbi arsyet që qëndrojnë pas këtij funksioni të ri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
