Angazhimi i parë i Shqipërisë si kryesuese e Këshillit të Sigurimit të OKB-së do të jetë thirrja e këtij organizmi në 2 qershor për të diskutuar mbi “forcimin e llogaridhënies dhe shkeljet e të drejtës ndërkombëtare”.
“Drejtësia dhe paqja ecin krah për krah dhe Shqipëria mbetet plotësisht e angazhuar në këtë drejtim. Jemi të privilegjuar që u japim zë bindjeve tona e do ta drejtojmë Këshillin e Sigurimit të Kombeve të Bashkuara me të gjithë vullnetin e pasionin tonë për ato çka besojmë fort”, ka qenë komenti i kryeministrit Edi Rama.
Por Shqipëria, thotë Radio Europa e Lirë, e merr kryesimin e Këshillit në njërën prej periudhave më të vështira gjeopolitike. Agresioni i Rusisë ndaj Ukrainës, kriza e refugjatëve e shkaktuar nga lufta, kërcënimet e vazhdueshme ruse ndaj aleatëve të NATO-s, zgjerimi i mëtejshëm i Aleancës ushtarake pro-perëndimore, sanksionet e Perëndimit ndaj Rusisë dhe varësia evropiane ndaj gazit rus, të gjitha këto cështje e kanë dominuar krejtësisht axhendën ndërkombëtare muajt e fundit.
Lexo edhe: OKB paralajmëron: Globi drejt katastrofës, ngrohja globale kërcënon jetët e njerëzve
“Lufta e Rusisë në Ukrainë e ka sfiduar sigurinë europiane dhe ka tronditur rendin botëror bazuar në rregulla. Ne nuk mundemi e nuk duhet të mësohemi me pandëshkueshmërinë. Është urgjente të veprojmë, tani, për viktimat e panumërta të konflikteve të pakuptimta”, citon REL të thotë Rama.
Shqipëria i merr frerët e Këshillit të Sigurimit nga sot, hera e parë për vendin tonë që i besohet një rol i tillë në këtë organizatë ndërkombëtare, pasi u përzgjodh këtë vit si anëtare e përkohshme e tij.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
