Në rrethanat e përhapjes së COVID-19, mësimi në distancë ka marrë rol parësor për të kapërcyer pengesën e ndjekjes fizike të studimeve për shkak të izolimit social. Kjo pasqyrohet edhe në arsimin dhe formimin profesional (AFP), i cili veç të tjerash has edhe sfidën e zhvillimit të praktikave profesionale.
Për të adresuar situatën e mbylljes së shkollave profesionale dhe si pjesë e përpjekjeve për të promovuar mësimin online, projekti “Aftësi për Punë” ka shtrirë dhe intensifikuar ndihmën ndaj shkollave partnere të projektit dhe më gjerë, për përdorimin e platformës “MësoVET”.
Platforma është një mjedis virtual i të mësuarit i zhvilluar nga S4J dhe bërë funksional gjatë vitit 2018. Në fund të muajit mars, projekti “Aftësi për Punë” realizoi sondazhe me nxënës dhe mësues në 10 shkolla të AFP, prej të cilave 9 shkolla partnere të projektit. Ky është studimi i parë i këtij lloji për AFP në Shqipëri dhe synon kryesisht të bëjë një vlerësim të shpejtë të situatës, të kuptojë eksperiencën dhe sfidat e mësuesve dhe nxënësve, si dhe të informojë hapat e nevojshëm për përmirësimin e procesit.
Lexo: Platforma “MësoVet”, vjen falas për mësuesit dhe nxënësit e Arsimit Profesional
Disa nga gjetjet kryesore të raportit, janë:
1- Duket se mësimi në distancë është pranuar si zgjidhja më të mirë për realizimin e procesit mësimor në situatën e krijuar.
2- Sjellja e mësuesve dhe nxënësve po ndryshon dhe po i përshtatet realitetit të mësimit nga shtëpia.
3- Procesi mësimor po realizohet kryesisht me WhatsApp (82% e mësuesve dhe 63% e nxënësve).
Platforma digjitale si “MësoVET” apo Google Classroom përdoren në përqindje më të ulëta (11% e mësuesve dhe 20% e nxënësve).
4- Ndërhyrjet nga projekti S4J, si me platformën “MësoVET” dhe me trajnimin dhe mbështetjen e mësuesve, ka ndikuar pozitivisht dhe i ka gjetur shkollat partnere të projektit më të përgatitura në përballimin e kësaj situate.
5- Përdorimi masiv i platformave digjitale të mësimit në distancë online kërkon ende shumë punë dhe angazhim të palëve, edhe gjatë periudhave normale të mësimit.
6- Mungesa e pajisjeve elektronike dhe mbështetja në internet të vazhdueshëm e dobësojnë cilësinë e mësimit në distancë online.
7- Mungesa e materialeve mësimore digjitale është ndër pengesat kryesore për përdorimin e platformave digjitale nga ana e mësuesve.
8- Nevoja për implementim të menjëhershëm të mësimit në distancë online vuri në dukje domosdoshmërinë për digjitalizimin dhe inovacionin e sistemit arsimor në tërësi.
“Aftësi për Punë” (S4J) është një projekt i Agjencisë Zvicerane për Zhvillim e Bashkëpunim (SDC), i cili zbatohet në Shqipëri nga organizata Swisscontact. Ky projekt synon t’u ofrojë të rinjve shqiptarë cilësinë më të lartë të arsimit e formimit profesional dhe si rezultat i kësaj, një punësim më të shpejtë e të denjë.
Projekti mbështet 10 institucione të AFP-së në Shqipëri (32% të nxënësve në AFP) për të aplikuar mënyra të reja të të nxënit, krijuar marrëdhënie të ngushta me bizneset, ofruar praktika profesionale në kompani dhe për t’i ndihmuar nxënësit të kualifikohen për tregun e punës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
