Me ekonominë globale që lëkundet ndërmjet pasigurive dhe presioneve inflacioniste, gjithnjë e më shumë investitorë po kthejnë vëmendjen nga ari, metali i çmuar që prej shekujsh ka qenë simbol i sigurisë dhe mbrojtjes financiare. Çmimi i tij i tejkaloi 3,400 dollarë për ons gjatë prillit, një nivel rekord që vjen si pasojë e blerjeve masive nga bankat qendrore, të cilat po e shohin arin si një alternativë të besueshme përballë dollarit amerikan.
Lexo gjithashtu: I ngjan Elon Musk, por nuk e merr si kompliment: “Ai nuk është një njeri i mirë”
Por përpara se të investoni në këtë “tokë të shenjtë” të financave, ekspertët paralajmërojnë se duhet të keni parasysh disa pika kyçe. Ja pesë këshillat më të rëndësishme për çdo investitor të arit sot:
Ari është një mbrojtës, jo një kampion rritjeje
Sipas Henry Yoshida, bashkëthemelues dhe CEO i Rocket Dollar, një platformë fintech për investime alternative, ari nuk duhet parë si një instrument fitimprurës afatshkurtër. “Ari është një aset sigurie që mbahet për qëllime mbrojtëse,” thekson ai. Për shkak se nuk ka lidhje të drejtpërdrejtë me bursat e aksioneve, ari mund të mbrojë portofolin tuaj në kohë krizash, duke ruajtur vlerën ose edhe duke u rritur, kur tregjet e tjera bien.
Lexo gjithashtu: Shqipëri-Kosovë, nga 1 maji hiqen kontrollet kufitare për shtetasit e dy vendeve
Bankat qendrore po blejnë me shumicë, një sinjal për të mbajtur apo shtuar investimet
Brandon Aversano, CEO i “The Alloy Market”, thekson se bankat qendrore po rrisin rezervat e arit për të zbutur varësinë nga dollari amerikan. Kjo sjellje jo vetëm që ul ofertën në treg, por rrit presionin për rritje të çmimeve. Dhe kur institucionet më të mëdha financiare bëjnë blerje afatgjata, është një tregues se kërkesa do të mbetet e lartë edhe në të ardhmen.
Diversifikimi është thelbësor, mos e mbingarkoni portofolin me ar
Edhe pse tundimi për të investuar më shumë në ar është i kuptueshëm, Yoshida këshillon që përbërja e tij në portofolin tuaj të mos kalojë 5-10%. Nëse jeni fillestar, mund të nisni edhe me më pak. Kjo qasje ju lejon të përfitoni nga stabiliteti i arit, por pa rrezikuar tepër në rast të ndonjë rënieje të çmimit.
Ari shkëlqen në kohë pasigurie, dhe historia e ka provuar këtë
Për Phillip Patrick, ekspert i metaleve të çmuara te Birch Gold Group, ari nuk ka rival kur bëhet fjalë për mbrojtje nga rreziqet gjeopolitike dhe ekonomike. “Është e vetmja formë universale dhe historike për të ruajtur vlerën,” thotë ai. Ndryshe nga aksionet apo obligacionet që varen nga kompanitë dhe politikat, ari ruan vlerën e tij pavarësisht kushteve të jashtme.
Nëse doni kontroll të plotë, blini ar fizik, por planifikoni daljen
Ndryshe nga ETF-të apo kontratat e së ardhmes, që ndjekin çmimin e arit në treg, blerja e arit fizik, si monedha ose shufra, ju jep një aset konkret jashtë sistemit financiar. Por kujdes, para se të blini, mendoni edhe si do ta shisni më vonë. Aversano këshillon të studioni paraprakisht tregun dhe të gjeni blerës të besueshëm, sidomos në platformat online me reputacion.
Ari nuk është thjesht një aset financiar; ai është një strategji për të ruajtur qetësinë në kohë trazirash. Nëse zgjidhni të hyni në këtë treg sot, bëjeni me mendje të ftohtë, informacion të saktë dhe një plan të qartë. Fundja, edhe në botën moderne, disa gjëra nuk ndryshojnë kurrë, dhe besimi në ar është një prej tyre.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
