Ndërsa Apple vazhdon të konsiderohet një nga kompanitë më të mëdha dhe më të suksesshme në botë, pyetja që po shtrohet gjithnjë e më shpesh në tregjet financiare është kjo, a është ende aksioni i saj një investim i mençur?
Në pamje të parë, Apple mbetet një emër i fuqishëm. Kompania gëzon një pozicion lider në treg, një markë globale të respektuar, marzhe të larta fitimi dhe një rezervë të konsiderueshme parash. Por kur shikohen me kujdes të dhënat ekonomike dhe performanca e aksionit, krijohet një tjetër tablo, më pak entuziaste.
Lexo gjithashtu: iPhone 17 Pro Max mund të kushtojë deri në 2,300 dollarë, shkak tarifat e reja të Trump
Aktualisht, aksionet e Apple tregtohen me një raport çmim ndaj fitimit (P/E) rreth 35, një vlerësim që në mënyrë tipike u rezervohet kompanive me rritje të shpejtë ose me kthime të larta për investitorët. Por Apple nuk ofron më asnjërën prej këtyre.
Në 12 muajt e fundit, të ardhurat e saj janë rritur me vetëm 2.6%, ndërsa rritja mesatare vjetore në tre vitet e fundit është edhe më e ulët, vetëm 1.5%. Këto shifra e bëjnë të qartë se Apple po funksionon si një biznes i konsoliduar, jo më si një motor rritjeje.
Lexo gjithashtu: Google paditet me 6.6 miliardë dollarë në Britani!
Edhe kthimet që ofron kompania janë të zbehta. Me një yield të fluksit të lirë të parasë më pak se 3% dhe një dividend simbolik për investitorët që kërkojnë të ardhura të rregullta, Apple duket më shumë si një obligacion i shtrenjtë me luhatshmëri të lartë, sesa një investim premtues në sektorin e teknologjisë.
Megjithëse Apple mbetet një kompani me rezultate të shkëlqyera, me një marzh operacional mbi 30%, besnikëri të lartë nga klientët dhe një ekosistem të mbyllur që vështirësohet të braktiset, investimi në aksionet e saj nuk është më aq atraktiv. Për më tepër, që nga fillimi i vitit 2021, aksioni ka sjellë kthime të kufizuara, ndërsa luhatshmëria e tij ka qenë mbi 1.5 herë më e lartë se e indeksit S&P 500.
Lexo gjithashtu: “Shtatëshja Madhështore” fiton 1.5 trilionë dollarë pas vendimit të Trump për tarifat
Për ata që merren me tregti afatshkurtër, Apple mbetet një instrument i dobishëm, është i likuid, ndiqet gjerësisht dhe reagon fort ndaj lajmeve ekonomike dhe rezultateve tremujore. Por për investitorët afatgjatë që kërkojnë stabilitet dhe të ardhura të vazhdueshme, argumentet për të mbajtur aksionin e Apple në portofol janë dobësuar ndjeshëm.
Apple është ende një kompani e shkëlqyer, por nëse është ende një investim i shkëlqyer, kjo është një çështje që kërkon analizë më të thellë dhe ndoshta një rishikim të strategjive të investimit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
