Google është paditur me 5 miliardë dollarë për shkelje të privatësisë të përdoruesve të tij. Juristët pretendojnë se gjigandi i kërkimit ka gjurmuar historinë e kërkimit të miliona përdoruesve të saj, pavarësisht se ata kaluan në “Incognito” të Google Chrome, i cili siguron njerëzit që historia e tyre nuk ruhet.
Juristët që merren me çështjen, kanë thënë se depoja e të dhënave personale të Google është “diçka që shkrimtari George Orwell as nuk mund ta imagjinonte.” Procedimi gjyqësor u regjistrua në San Jose, California, dhe pretendon se nëse një përdorues klikon ose jo reklama të mbështetura nga Google, kompania vazhdon të mbledhë të dhëna për atë person përmes aplikacioneve të ndryshme, të tilla si Google Analytics.
Rezultati i kësaj, është se Google është në gjendje të krijojë një pamje të qartë të këtij përdoruesi, nga miqtë dhe hobi i tyre dhe tek “gjërat më intime dhe potencialisht të sikletshme” që ata kërkojnë në internet.
Google nga ana tjetër i kundërshton pretendimet, ku zëdhënësi Jose Castaneda i tha CNET : ” Incognito në Chrome ju jep mundësinë që të shfletoni internetin në mënyrë të sigurte. Siç e kemi deklaruar edhe më herët , faqet e internetit mund të jenë në gjendje të mbledhin informacione rreth aktivitetit tuaj. ”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto