Ministrja e Shëndetësisë u shpreh se plani i hapjes do të jetë me katër faza. Sipas saj, përparësi kryesore kanë ato aktivitete, të cilat kanë impakt pozitiv në ekonomi dhe gjithashtu një risk të ulët për përhapjen e pandemisë globale të COVID-19.
“Na rezulton se kemi mbi 100 vatra aktive në të gjithë Shqipërinë. Numri i shtrimeve në spital është i qëndrueshëm. Bazuar në këtë vlerësim dinamik, Komiteti Teknik i Ekspertëve ka hartuar planin për lehtësimin e masave. Ky plan bazohet në disa kritere si: kriteret epidemiologjike, kriteret spitalore dhe burimet e kontrollit. Plani cakton që të hapen aktivitetet me më shumë efekt në ekonomi dhe më pak risk”.
“Çdo hapje do të ketë protokolle strikte. Lehtësimi do të ketë katër faza, sipas udhëzimeve të hartuara nga OBSH-ja. Për zbatimin e masave po ngrihet Task-Forca për të monitoruar situatën në terren. Çdo biznes duhet të zbatojë me përpikmëri masat. Çdo biznes duhet të marrë vërtetimin në e-albania dhe ta afishojë atë në ambientet e punës dhe të njihen punonjësit me këto rregulla”, tha Ogerta Manastirliu.
Lexoni: Protokollet, që duhet të zbatojnë bizneset e hapura
Ministrja lajmëroi zgjerimin e fashës orare për këmbësorët dhe hapjen e një seri biznesesh, duke filluar nga java tjetër.
“Nëse treguesit do të jenë të qëndrueshëm, nga java e ardhshme, do të rrisim në 2 orë e 30 minuta fashën orare për individët. Do të hapim një kategori biznesesh, që nga tregtimi i veshjeve, këpucëve, tekstileve, mobiljeve, ndriçimit, pajisjeve elektronike, dyqaneve të luleve etj, për të lehtësuar ekonomitë familjare. Do të lejojmë transportin taksi nga qyteti në qytet me vetëm një person pasagjer, sipas masave të përcaktuara në protokollin specifik për udhëtimin me taksi”, tha Manastirliu.
Gjatë komunikimit të saj me publikun, ministrja Manastirliu tha se vlerësimi për hapjen graduale do të jetë shumë i kujdesshëm dhe do të përcaktohet nga situata e COVID-19 në terren.
“Vlerësimi i çdo hapi të ndërmarrë do të analizohet çdo dy javë. Në rast se nuk do të kemi tregues të qëndrueshëm të situatës epidemike, plani parashikon edhe rikthim të masave të ashpra”.
Lexoni: Nis aplikimi për pagën e luftës prej 40 mijë lekësh
Në rast se situata do të vijojë të jetë e qëndrueshme pas analizave të përdyjavëshme, pra nëse nuk do të kemi nevojë për frenat e emergjencës që janë gjithmonë aty, atëherë, në fillim të muajit maj do të zgjerojmë lëvizjen e makinave brenda një bashkie, me fasha orare edhe për ata, që duan të shkojnë për pazar si dhe do të lehtësojmë më tej lëvizjen e këmbësorëve brenda qyteteve”, komunikoi Manastirliu.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
