Mbi 24 orë pas tërmetit tronditës, Qeveria Shqiptare zhvillon një mbledhje të jashtëzakonshme.
Kryeministri Edi Rama shpalli gjendjen e jashtëzakonshme për zonën Tiranë-Durrës. Ndërsa e Mërkura është ditë zie Kombëtare dhe të Enjten 28 Nëntor nuk do të zhvillohen festimet e planifikuara për ditën e ngritjes së flamurit.
Kryeministri tha se, “vendi është përballur me një situatë sfiduese, por që po e përballon me të gjitha mjetet e nevojshme”.
Pas kësaj situate pritet të rishikohet sërish buxheti i vitit të ardhshëm, i cili po diskutohej ndërkohë në komisionet parlamentare.
Rama tha se do të rindërtohen të gjitha banesat e prishura në Tiranë e Durrës. Financimi do të mbështetet nga buxheti i shtetit, por nuk do të ketë kufizime edhe për huamarrje nga jashtë. Qeveria ka ngritur Komitetin Kombëtar për Rindërtimin nën kryesimin e Arben Ahmetajt, kryetar i Komisionit Parlamentar të Ekonomisë dhe ish ministër i Financave. Ky komitet do të ketë kompetencat e një ministrie të posaçme.
Rama tha në mbledhjen e jashtëzakonshme të qeverisë se, “Duhet që familjeve në Thumanë t’u rindërtojmë banesat. Një sfidë e madhe, do të bazohemi tek buxheti i qeverisë, te buxheti i bashkive sikundër imponon ligji për gjendjen e jashtëzakonshme, por nuk mjafton. Dhe për këtë po punojmë për një skemë financimi që të na mundësojë një mbulim tërësor. Pa u kufizuar apo pa u mbuluar thjesht me anën tjetër që është mekanizmi i financimit të jashtëm”.
Sipas Ramës, duhet një Komitet Kombëtar për Rindërtimin. “Duhet t’ia besojmë drejtimin kryetarit aktual të Komisionit të Financave dhe Ekonomisë, për të pasur një individ që ka të gjithë eksperiencën, por nuk ka dhe gjithë ngarkesën e përditshme të një anëtari të kabinetit qeveritar për të pasur një ndërveprim shumë më aktiv dhe shumë më harmonik mes kabinetit”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
