Gjatë vizitës së zhvilluar në zyrat e New Media, ata takuan Gerti Boshnjakun, themelues i kompanisë dhe njëkohësisht edhe Drejtor i Startup Grind Tirana.
Dhoma e Tregtisë dhe Industrisë së Tiranës në bashkëpunim me Dhomën e Tregtisë së Romës po realizojnë internship-e të bizneseve startup mes dy vendeve.
Pjesë e vizitës nga grupi italian ishin të rinj, që me idetë e tyre të biznesit, synojnë të mund të eksportojnë e të zhvillojnë biznes edhe në Shqipëri.
Projekti mbështetet nga Ministria e Jashtme Italiane dhe ka në fokus të rinjtë mes moshës 18-35 vjeç, për biznese që kanë interes për tregtinë ndërkombëtare.
Të rinjtë italianë u njohën me klimën e startup-eve në Shqipëri, inkubatorët, mundësitë e financimit dhe legjislacionin. Gerti Boshnjaku tha se, në Shqipëri ka disa nisma për nxitjen dhe mbështetjen e ideve të reja. Përmes Startup Grind, Inovate Albania dhe disa organizmave të tjera në vend, të rinjtë kanë arritur të maturojnë idetë e tyre të biznesit, duke shënuar madje edhe raste të suksesshme, që kanë arritur të bëhen pjesë e tregut ndërkombëtar, siç është kompania Softmogul.
Sipërmarrësit e rinj italianë ishin të interesuar për nivelin e përdorimit të teknologjisë nga sipërmarrje të ndryshme në vend. Ndërsa përfaqësuesit e Dhomës së Tregtisë së Romës theksuan se Italia ka krijuar një kuadër të plotë legjislativ e fiskal për startup-et, duke u dhënë atyre edhe një përkufizim të saktë, e lehtësi për vitet e para të aktivitetit. Një nga kushtet për t’u cilësuar biznes startup, e rrjedhimisht për të përfituar lehtësi, (si p.sh. 20% e pagës mujore të të punësuarve), është përdorimi i teknologjive më të avancuara në zhvillimin e biznesit, si në prodhim edhe shërbim.
Të rinjtë italianë kanë takuar në Tiranë, përfaqësues zyrtarë të ekonomisë vendase, sipërmarrës dhe organizata që ndikojnë në zhvillimin e bizneseve start-up.
Pas kësaj edhe një grup të rinjsh nga Shqipëria pritet të vizitojnë Romën për t’u njohur nga afër me strartup-et dhe klimën atje.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
