Google përshpejton garën në AI, drejt zhvillimit të çipave të rinj me Marvell

Google po zhvillon bisedime me Marvell Technology për krijimin e dy çipave të rinj të fokusuar në inteligjencën artificiale, në një përpjekje për të forcuar pozicionin e saj në një treg gjithnjë e më konkurrues.

Lexo gjithashtu: Historia e “babait” që po ndryshon jetë përmes YouTube

Sipas raportimeve, njëri prej çipave do të jetë një njësi e përpunimit të memories, e dizajnuar për të punuar në sinkron me procesorët TPU të Google. Çipi i dytë pritet të jetë një gjeneratë e re TPU, e optimizuar posaçërisht për ekzekutimin e modeleve të avancuara të AI. Qëllimi është i qartë: krijimi i një alternative më të fortë ndaj GPU-ve që dominohen nga Nvidia.

Google po e vendos gjithnjë e më shumë theksin te infrastruktura e saj AI, duke e kthyer TPU-në në një aset strategjik për shërbimet cloud. Kompania ka sinjalizuar se kërkesa për këto çipa po ndikon drejtpërdrejt në rritjen e të ardhurave nga cloud, një treg ku konkurrenca po intensifikohet.

Objektivi fillestar është që dizajni i çipit të memories të përfundojë brenda vitit të ardhshëm, përpara se të kalojë në fazën e prodhimit testues. Deri më tani, asnjë nga kompanitë nuk ka konfirmuar zyrtarisht projektin.

Paralelisht, Google po vijon të zgjerojë ekosistemin e saj të AI përmes platformës Gemini. Pas lançimit të funksionit “Personal Intelligence” në SHBA, kompania po synon një shpërndarje globale, megjithëse përdoruesit në Bashkimin Evropian, Zvicër dhe Mbretërinë e Bashkuar mbeten për momentin jashtë këtij zgjerimi.

Kjo lidhet edhe me presionin rregullator nga European Commission, e cila në kuadër të Digital Markets Act po kërkon që Google të hapë akses në të dhëna kyçe për motorë të tjerë kërkimi, me synim rritjen e konkurrencës në tregun digjital.

Gara për dominim në AI po zhvendoset gjithnjë e më shumë te infrastruktura dhe fuqia përpunuese, investimet në çipa të specializuar mund të jenë faktori që do të përcaktojë liderët e ardhshëm të industrisë.