Tregjet globale reaguan negativisht dhe çmimet e naftës u rritën ndjeshëm pasi Presidenti i SHBA-së, Donald Trump, deklaroi në fjalimin e tij të parë kombëtar që nga nisja e luftës me Iranin se operacionet ushtarake do të vazhdojnë dhe se SHBA do ta “përfundojë misionin”.
Në vend që të shpallte një fitore apo të ofronte qartësi mbi strategjinë, Trump paralajmëroi sulme të reja gjatë dy deri në tre javët e ardhshme. Kjo riktheu frikën për një valë të re inflacioni dhe një ngadalësim të rritjes ekonomike globale.
Shpresat për një përfundim të afërt të konfliktit u zbehën, duke ushtruar presion mbi bursat në Evropë dhe Azi, ndërsa nafta mori një tjetër shtysë në rritje. Nafta Brent, referenca ndërkombëtare, u ngjit përkohësisht mbi 108 dollarë për fuçi, për t’u stabilizuar rreth 107.70 dollarë në hapje të tregjeve evropiane. Ndërkohë, nafta amerikane WTI u rrit me 6.2%, duke arritur në 106.30 dollarë për fuçi.
Në fjalimin e tij në orarin më të ndjekur televiziv, Trump u shpreh: “Do t’i godasim jashtëzakonisht fort gjatë dy deri në tre javëve të ardhshme. Do t’i kthejmë në epokën e gurit.”
Presidenti amerikan premtoi gjithashtu goditje të mëtejshme ndaj infrastrukturës energjetike nëse nuk arrihet një marrëveshje me Teheranin, duke shtuar se objektivat strategjikë janë “afër përmbushjes” dhe se operacionet mund të përmbyllen së shpejti.
Megjithatë, ai shmangu përmendjen e afatit që kishte vendosur më herët për hapjen e Ngushtica e Hormuzit, një arterie kritike për transportin global të naftës dhe gazit. Po ashtu, nuk dha një plan konkret për zgjidhjen e ndërprerjeve të furnizimit që kanë çuar në rritjen e çmimeve të energjisë.
Lexo edhe: Çfarë do të thotë nisma “Dyfisho ndërmarrjen tënde” për bizneset e vogla dhe të mesme
“Tregu u zhgënjye sepse fjalimi ishte shumë më pak se sa pritej,” u shpreh Takashi Hiroki, strateg kryesor në Monex në Tokio. “Nuk pati asnjë detaj konkret për përfundimin e armiqësive me Iranin. Ajo që tregu kërkon është një skicë e qartë për armëpushimin.”
Indekset kryesore evropiane hapën në rënie: FTSE 100 në Londër ra me 0.7%, CAC 40 në Paris humbi 1.2%, ndërsa DAX në Frankfurt u tkurr me 1.5%. Në të njëjtën linjë, bursat në Milano dhe Madrid shënuan rënie përkatësisht 1.3% dhe 1.5%.
Ndër kompanitë, ENI dhe TotalEnergies rezultuan ndër fituesit e rrallë, me rritje mbi 2%, ndërsa Deutsche Telekom, Schneider Electric, Rheinmetall, Infineon Technologies dhe ASML Holding ranë mbi 3%. Euro humbi 0.5% ndaj dollarit amerikan, duke zbritur në 1.1531. Në Azi, humbjet ishin edhe më të theksuara: Nikkei 225 ra me 2.4%, ndërsa KOSPI u tkurr me 4.5%. Hang Seng humbi 1.1%, ndërsa Shanghai Composite Index ra me 0.7%.
Kontratat e ardhshme në SHBA sinjalizuan gjithashtu rënie, mes 1.1% dhe 1.5%. Ndërkohë, metalet e çmuara pësuan rënie: ari u ul me 3.5% në 4,644.40 dollarë për ons, ndërsa argjendi ra me 6.8% në 70.90 dollarë për ons, duke reflektuar një treg të paqëndrueshëm dhe të mbushur me pasiguri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
