Takimi i radhës i klubit të librit Bytes & Books do të zhvillohet më 26 mars, në orën 18:00, dhe këtë herë do të fokusohet te libri i ri i ekspertit të marketingut digjital Renato Civili, i titulluar “Strategjia Fituese”.
Libri trajton mënyrën se si marketingu mund të bëhet një mjet i qartë dhe praktik për rritjen e biznesit dhe të brendit personal. Në vend që marketingu të shihet si një proces i ndërlikuar, autori sjell një qasje të thjeshtë dhe të strukturuar, duke ofruar hapa konkretë për të ndërtuar strategji efektive komunikimi dhe për të arritur rezultate reale në treg.
Në këtë libër, lexuesit do të mësojnë si të mendojnë si marketerët më të suksesshëm dhe të zhvillojnë aftësitë kryesore të marketingut dhe botës digjitale. Ai trajton tema të rëndësishme si identifikimi i klientëve idealë, ndërtimi i strategjive të komunikimit digjital, përdorimi i mediave sociale dhe inteligjencës artificiale për të fituar vëmendjen e audiencës, si dhe krijimi i fushatave që rrisin shitjet në botën online.
Gjithashtu libri ndalet te sekretet e copywritting, rëndësia e një website efektiv, marketingu me email dhe mënyrat se si klientët mund të kthehen në promotorë të brendit. Një tjetër dimension i rëndësishëm që trajton është ndërtimi i brendit personal dhe zhvillimi i lidershipit në industri. Sipas autorit, të gjitha këto aftësi mund të ndërtohen përmes një serie hapash praktikë që ndihmojnë profesionistët të dalin më të përgatitur në treg.
Libri është shkruar për një audiencë të gjerë që përfshin sipërmarrës, menaxherë, profesionistë të marketingut, freelancerë dhe këdo që dëshiron të rrisë biznesin apo brendin e tij në epokën digjitale.
Takimi i Bytes & Books do të jetë një mundësi për të diskutuar mbi idetë kryesore të librit, për të reflektuar mbi sfidat e marketingut në praktikë dhe për të ndarë perspektiva mbi mënyrën se si bizneset dhe profesionistët mund të ndërtojnë strategji më të forta për rritje.
Eventi do të zhvillohet më 26 mars, në orën 18:00, dhe pritet të mbledhë profesionistë të marketingut, sipërmarrës dhe lexues të interesuar për zhvillimin e aftësive në komunikimin dhe strategjinë digjitale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
