Shkrimtari i njohur britanik Ian McEwan beson se, pavarësisht krizave globale dhe sfidave ekzistenciale që përballet njerëzimi, e ardhmja mbetet në duart tona.
Në romanin e tij më të ri, What We Can Know, ai imagjinon një të ardhme të formësuar nga ndryshimet klimatike dhe konfliktet, ku popullsia globale ka rënë, nivelet e deteve janë rritur dhe biodiversiteti është tkurrur. Megjithatë, mes këtij realiteti të vështirë, njerëzit vazhdojnë të përshtaten dhe të mbijetojnë.
McEwan thotë se ndryshimi klimatik nuk është më një skenar fantastiko-shkencor, por një realitet i prekshëm. “Në vitet ’90 flisnim për klimën si diçka të largët. Sot është pjesë e jetës sonë të përditshme,” thekson ai. Sipas shkrimtarit, zgjidhja nuk është e pamundur: kalimi drejt një ekonomie elektrike dhe heqja dorë nga lëndët djegëse fosile janë hapa të realizueshëm.
Përtej shqetësimeve për klimën, ai shpreh habi dhe pasiguri edhe për zhvillimin e inteligjencës artificiale, e cila tashmë është e aftë të krijojë muzikë dhe tekste me një nivel të lartë sofistikimi. Megjithatë, ai përpiqet të ruajë një qasje optimiste.
Lexo gjithashtu: Osborne i OpenAI: Vendet që nuk e përqafojnë inteligjencën artificiale mund të mbeten të varfra
Shpresa e tij mbështetet edhe në projekte konkrete mjedisore, si zonat e mbrojtura detare në Skoci, ku natyra është rigjallëruar sapo aktiviteti njerëzor është ndalur. Sipas tij, kjo dëshmon për një rezistencë të brendshme të natyrës dhe të vetë njerëzimit.
“Ka mijëra iniciativa të vogla nëpër botë. Ndoshta ende nuk i kemi bashkuar të gjitha,” thotë ai. “Por e vërteta është e thjeshtë: ne thjesht duhet të ndalojmë së bëri gjëra të këqija dhe të fillojmë të bëjmë gjëra të mira.”
Romani What We Can Know është botuar nga shtëpia botuese Jonathan Cape dhe është tashmë në qarkullim.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
