Çfarë ndodh pas vdekjes? Kjo është një pyetje që të gjithë e kemi bërë të paktën një herë. Dhe duket se Meta ka gjetur një mënyrë për të të “mbajtur gjallë” edhe pasi të ndërron jetë, të paktën në rrjetet sociale.
Ne nuk e dimë realisht çfarë ndodh me ne pas vdekjes. Por Meta duket se ka gjetur një “zgjidhje” për pyetjen: çfarë ndodh me llogarinë tënde në rrjetet sociale pasi ti ndërron jetë? Përgjigjja, sipas dokumenteve të fundit, është inteligjenca artificiale.
Sipas Business Insider, Meta ka marrë në dhjetor 2025 një patentë që do t’i lejonte AI-së të sillej si ti në rrjetet sociale. Patenta, e depozituar në vitin 2023 dhe e atribuar Andrew Bosworth, drejtorit të teknologjisë në Meta, përshkruan një sistem ku një model i madh gjuhësor mund të “simulojë” sjelljen online të një personi gjatë mungesës së tij. Në dokument thuhet se modeli i AI-së mund të veprojë si përdoruesi nëse ai merr një pauzë të gjatë nga platforma e rrjeteve sociale, ose nëse ka ndërruar jetë. Sistemi do të trajnohej me të dhëna specifike të përdoruesit, përfshirë postimet e mëparshme, komentet, pëlqimet dhe aktivitetet e tjera, me synimin për të krijuar një “zëvendësues digjital” që sillet në mënyrë të ngjashme me mbajtësin origjinal të llogarisë.
Lexo edhe: “Diella” padit në Gjykatë qeverinë dhe AKSHI-n!
Pse një veçori e tillë?
Ndoshta po pyesni veten: pse do të na duhej një funksion i tillë? Sipas Meta-s, kjo mund të ndihmojë në reduktimin e ndikimit që ka zhdukja e një përdoruesi nga platforma. Dokumenti thekson se “ndikimi mbi përdoruesit e tjerë është shumë më i rëndë dhe i përhershëm kur një person ndërron jetë dhe nuk mund të kthehet më kurrë në platformën e rrjeteve sociale”. Në këtë këndvështrim, një AI që “merr përsipër” llogarinë e një personi të ndjerë mund ta bëjë më të lehtë për familjarët dhe miqtë e tij të përballen me mungesën e pranisë së tij online.
Ky nuk është rasti i parë që dëgjojmë për koncepte të tilla. E ashtuquajtura “grief tech” (teknologji për përballimin e humbjes) po bëhet gjithnjë e më popullore. Kjo kategori përfshin mjete që synojnë të ruajnë ose të rikrijojnë aspekte të një personi pas vdekjes.
Kompani si Replika dhe You, Only Virtual kanë hyrë tashmë në këtë fushë, ndërsa Microsoft patentoi në vitin 2021 një chatbot të aftë për të simuluar persona të ndjerë. Teknologji të tilla u lejojnë përdoruesve të kalojnë procesin e pikëllimit duke bashkëvepruar me një version të simuluar të një personi të dashur që ka ndërruar jetë.
Nga ana tjetër, nëse thjesht po bën një pauzë nga rrjetet sociale, kjo veçori mund të sigurojë që llogaria jote të vazhdojë të ketë ndërveprime aktive edhe në mungesën tënde.
Meta thotë se nuk ka plane ta zbatojë këtë patentë
Në pamje të parë, mund të duket sikur po shkojmë drejt një të ardhmeje distopike, ku AI fillon të shtiret si një person i vdekur vetëm për të mbajtur të lartë angazhimin në rrjetet sociale. Megjithatë, Meta ka deklaruar se “nuk ka plane për ta çuar përpara këtë shembull”. Shpesh, kompanitë depozitojnë patenta për ide dhe koncepte që nuk realizohen kurrë në praktikë. Edhe ky rast mund të jetë një prej tyre.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
