Një studim i ri shkencor ka zbuluar se një grup i caktuar gjaku lidhet ngushtë me jetëgjatësinë dhe rezistencën ndaj sëmundjeve serioze. Sipas të dhënave, grupi i gjakut 0 rezulton të jetë më i përhapuri tek personat që kanë kaluar moshën 100-vjeçare, duke ngritur interesin e komunitetit shkencor për rolin e faktorëve biologjikë në plakjen e shëndetshme.
Hulumtimet tregojnë se personat me grup gjaku 0 kanë një rrezik më të ulët për sëmundje kardiovaskulare, përfshirë infarktin e zemrës dhe goditjen në tru. Gjithashtu, ata shfaqin më pak raste të disa llojeve të kancerit, veçanërisht atij të stomakut dhe pankreasit. Ekspertët shpjegojnë se ky avantazh lidhet me faktin se gjaku i këtij grupi ka më pak faktorë që nxisin mpiksjen, çka ndikon drejtpërdrejt në uljen e rrezikut për bllokime arteriale dhe probleme serioze të qarkullimit të gjakut.
Studimi, i publikuar në revistën shkencore PLOS Genetics dhe i udhëhequr nga profesori Stuart Kim i Universitetit Stanford, analizoi materialin gjenetik të mbi 800 personave mbi 100 vjeç dhe rreth 5.400 individëve në të 90-at. Rezultatet treguan se personat jetëgjatë kanë më pak gjene të lidhura me sëmundje kronike, gjë që shpjegon pse ata sëmuren më rrallë dhe ruajnë një shëndet më të qëndrueshëm në moshë të thyer.
Studiuesit identifikuan katër gjene kryesore që ndikojnë në procesin e plakjes, përfshirë një gjen të lidhur drejtpërdrejt me grupin e gjakut, një tjetër që ndikon në ndarjen e qelizave, si dhe gjene që lidhen me rrezikun për Alzheimer dhe jetëgjatësinë. Në këtë analizë, grupi i gjakut 0 doli të ishte më i zakonshmi tek personat që kishin kaluar shekullin e jetës.
Sipas profesorit Kim, njerëzit jetojnë më gjatë pjesërisht sepse nuk preken shpesh nga sëmundje të rënda. Ai shton se ekziston mundësia që këta individë të kenë mekanizma mbrojtës natyrorë kundër plakjes, të cilët ende nuk janë kuptuar plotësisht nga shkenca, por që mund të hapin rrugë për trajtime dhe parandalime të reja në të ardhmen.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
