Banka Qendrore Europiane vendosi të mbajë të pandryshuara normat e interesit, duke theksuar se ekonomia e eurozonës po hyn në një fazë transformimi strukturor të nxitur nga inteligjenca artificiale. Presidentja Christine Lagarde theksoi se politika monetare është “në një pikë të mirë”, por mbetet fleksibile dhe plotësisht e varur nga të dhënat, në një mjedis me pasiguri të lartë globale.
AI po shfaqet si motor kyç i rritjes ekonomike, duke orientuar investimet si nga korporatat e mëdha, ashtu edhe nga ndërmarrjet e vogla e të mesme drejt kapaciteteve kompjuterike, rrjeteve digjitale, softuerit dhe të dhënave, në vend të kapitalit fizik tradicional. Ky ndryshim po riformëson strukturën e rritjes në eurozonë dhe po rrit peshën e kërkesës së brendshme.
Megjithatë, Lagarde paralajmëroi se ndikimi i AI në produktivitet dhe në normën neutrale të interesit mbetet i pasigurt, duke refuzuar çdo përfundim të parakohshëm. Në këtë kontekst, BQE po ndjek nga afër inflacionin e shërbimeve dhe dinamikën e pagave, faktorë kyç për stabilitetin afatmesëm të çmimeve.
Në thelb, mesazhi i BQE-së është i qartë: inteligjenca artificiale po ndryshon themelet e ekonomisë europiane, por politika monetare do të ecë me kujdes, pa orientim paraprak për normat e interesit, duke ruajtur të hapura të gjitha opsionet përballë një transformimi teknologjik ende në zhvillim.
Euroja digjitale dhe asetet e ngrira ruse
Sa i përket euro-së digjitale, Lagarde tha se BQE-ja ka përfunduar punën teknike dhe përgatitore, dhe se përgjegjësia tani u takon institucioneve politike.
Projekti, që synon krijimin e një mjeti publik digjital pagese, po shqyrtohet aktualisht nga Këshilli Europian dhe Parlamenti Europian. “Ambicia jonë është të sigurohemi që, në epokën digjitale, të ekzistojë një monedhë që vepron si ankorë stabiliteti për sistemin financiar,” tha ajo, duke e paraqitur euron digjitale si një instrument të sovranitetit monetar, e jo si risi për hir të risisë.
Lexo edhe: Eurozona rezistente ndaj goditjeve globale, BQE konfirmon kursin monetar
Lagarde u ndal edhe te çështja delikate e përdorimit të aseteve të ngrira të bankës qendrore ruse për rindërtimin e Ukrainës. Ndërsa shprehu besimin se liderët europianë do të gjejnë një zgjidhje, ajo vendosi një vijë të qartë rreth mandatit të BQE-së.
Çdo mekanizëm që nënkupton financim monetar, paralajmëroi ajo, do të shkelte traktatet e BE-së. Vendimet për përdorimin e aseteve të ngrira, sipas saj, mbeten përgjegjësi e liderëve politikë, jo e bankierëve qendrorë.
Si reaguan tregjet dhe ekspertët
Mohamed El-Erian, këshilltar kryesor ekonomik në Allianz, vlerësoi performancën e Lagarde, duke e përshkruar si një “masterclass”. Ai theksoi rëndësinë e aftësive të saj komunikuese në stabilizimin e ndjenjës së tregjeve gjatë periudhave me pasiguri të lartë ekonomike. Roman Ziruk, analist i lartë i tregjeve në Ebury, tha se projeksionet më optimiste të rritjes nga BQE-ja dhe mesazhi i kujdesshëm ndihmuan në mbështetjen e euros kundrejt dollarit, së bashku me të dhënat e inflacionit në SHBA më të buta sesa pritej.
“Politika monetare mbetet në një ‘pikë të mirë’,” tha Ziruk, duke shtuar se presionet e vazhdueshme themelore të çmimeve forcojnë argumentin kundër uljeve të afërta të normave të interesit.
Euro mbeti e qëndrueshme pas konferencës për shtyp të Christine Lagarde, duke u tregtuar rreth 1.1730 dollarë, ndërsa yield-et e bonove 10-vjeçare gjermane qëndruan kryesisht të pandryshuara në 2.85%.
Ndërkohë, tregjet europiane të aksioneve u rritën të enjten pasdite, të nxitura nga një raport i inflacionit në SHBA më i ulët sesa pritej, i cili ushqeu optimizmin për lehtësim të vazhdueshëm monetar nga Rezerva Federale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
