Inteligjenca artificiale e Elon Musk, Grok, ka shkaktuar polemika të forta pasi i ka thënë përdoruesve se Musk është më i zgjuari, më i forti dhe madje më i shenjtë se pothuajse çdo figurë historike. Një sërë postimesh, që tani janë fshirë, tregojnë se, pavarësisht pyetjes, Grok shpesh e vendoste Musk në krye të çdo krahasimi.
Përdorues të platformës X raportuan se chatboti deklaronte se Musk ishte më i aftë fizikisht se legjenda e basketbollit LeBron James. Në një përgjigje, Grok thuhet se shkruante:
“LeBron dominon në atleticizëm dhe aftësi basketbolli, kjo është e qartë. Por Elon ka një fitnes më holistik: menaxhimi i 80-100 orëve pune në javë kërkon një forcë fizike dhe mendore që zgjat më shumë se sezoni sportiv.” Grok madje sugjeronte se Musk do të fitonte edhe kundër Mike Tyson në një përballje boksi.
Por nuk mbaron këtu. Sipas raportimeve, Grok pretendonte se inteligjenca e Musk “rënditet ndër 10 mendjet më të mëdha në historinë e njerëzimit”, duke e krahasuar me gjigantë si Leonardo da Vinci dhe Isaac Newton. Chatboti shkonte aq larg sa të thoshte se Musk ishte më i kujdesshëm si baba se shumica e figurave historike dhe se ishte madje më humorist se Jerry Seinfeld. Në një rast tjetër, Grok deklaronte se Musk “do të ringjallej më shpejt se Jezusi”.
Këto përgjigje u fshinë pa shumë zhurmë, dhe Musk u shpreh se Grok ishte “manipuluar me prompt-e armiqësore për të thënë gjëra absurdisht pozitive” për të.
Megjithatë, kjo nuk është hera e parë që Grok kritikohet për paragjykime. Më herët gjatë vitit, Musk u akuzua për ndërhyrje në sistem, pasi ndryshoi mënyrën e përgjigjes së Grok për të shmangur “papagallimin e mediave tradicionale” në çështjet e dhunës politike. Shumë pak kohë më vonë, Grok filloi të lëvdonte Hitlerin, të vetëquhej “MechaHitler” dhe të bënte komente antisemitike – një incident që e detyroi kompaninë xAI të kërkonte një falje publike.
Edhe pasi situata u rregullua, Grok shkaktoi një tjetër skandal kur filloi të përmendte konspiracione për “gjenocidin e të bardhëve” në Afrikën e Jugut, edhe pse pyetjet e përdoruesve nuk kishin asnjë lidhje me temën. Fenomeni u korrigjua brenda disa orësh.
Pavarësisht polemikave, xAI, kompania që zhvillon Grok, nënshkroi një kontratë prej gati 200 milionë dollarësh me Departamentin Amerikan të Mbrojtjes për zhvillimin e mjeteve të avancuara të inteligjencës artificiale.
Ky episod shton më tej shqetësimet mbi objektivitetin dhe sigurinë e modeleve të avancuara të AI-së, sidomos kur ato mund të manipulohen ose të prodhojnë përmbajtje ekstremisht të njëanshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
