Në vend të mjekut, tek berberi, revolucioni britanik që po shpëton burrat

Në Britani, një model i ri i kujdesit shëndetësor po fiton terren, ai që nuk ndodh në spitale apo klinika, por në barbershops dhe fusha futbolli.
Arsyeja? Burrat janë ende më pak të prirur të kërkojnë ndihmë mjekësore sesa gratë, dhe kjo ka pasoja të rënda, ata jetojnë më shkurt dhe përballen më shpesh me sëmundje si presioni i lartë i gjakut, kanceri i prostatës dhe vetëvrasjet.

Për të ndryshuar këtë realitet, iniciativa të reja po u afrohen burrave aty ku ata ndihen më rehat, në klubet e futbollit dhe berberët lokalë.
Në stadiumin e Brighton & Hove Albion, një vullnetar i organizatës Samaritans u dha një mesazh mijëra tifozëve: “Është në rregull të flasësh për vetëvrasjen.”
Në të njëjtën kohë, 11 klube të Premier League kanë nisur programin “Together Against Suicide”, që ofron ndihmë dhe dëgjues të trajnuar gjatë ndeshjeve.

Por jo vetëm futbolli po bën diferencën. Në berberet e Londrës Jugore, klientët po marrin diçka më shumë se një prerje flokësh, kontrollin e tensionit të gjakut.
Berberë si Julian Appiah-Koduah janë trajnuar për të matur presionin arterial të klientëve, falë një nisme të Universitetit South Bank dhe organizatës Croydon BME Forum.

“Ne nuk mund të presim që njerëzit të vijnë tek ne në NHS. Duhet të shkojmë ne tek ata,” – thotë profesoresha dhe infermierja Nicola Thomas, e cila udhëhoqi projektin.

Në Barnsley, një qytet ish-minatorësh, berberi Tony Batty po bën të njëjtën gjë, pasi për pak humbi jetën nga presioni i lartë i gjakut. Sot ai mat tensionin e klientëve për t’u siguruar që askush tjetër të mos kalojë atë që ai përjetoi.

Siç thotë një nga organizatorët:

“I beson një njeriu që të vendos briskun nën qafë. Pse të mos i besosh edhe për një matje tensioni?”

Në thelb, kjo qasje e re po tregon se ndonjëherë shëndeti i burrave nuk kërkon më shumë spitale, por më shumë besim, komunitet dhe komunikim.

PN