Elon Musk ka bërë publik projektin më të ri të kompanisë së tij të inteligjencës artificiale xAI, një platformë të quajtur Grokiipedia, që synon të konkurrojë me enciklopedinë e njohur online Wikipedia.
Musk, i cili është gjithashtu pronar i platformës X, njoftoi se Grokiipedia do të jetë një përmirësim i madh në krahasim me Wikipedia-n.
“Ndihmoni në ndërtimin e Grokiipedia-s”, shkroi ai në një postim në X, duke ftuar kontribues dhe zhvillues t’i bashkohen projektit të ri të xAI.
Platforma e re do të përdorë inteligjencën artificiale për të korrigjuar automatikisht gabimet dhe për të siguruar që përmbajtja të jetë e saktë dhe faktike, në dallim nga Wikipedia, e cila mbështetet në redaktime nga komuniteti i gjerë i vullnetarëve.
Musk deklaroi se Grokiipedia do të jetë e aksesueshme për publikun pa kufizime, duke e prezantuar si një alternativë më të hapur dhe më transparente ndaj modelit aktual të Wikipedia-s.
Miliarderi ka qenë shpesh kritik ndaj Wikipedia-s, duke e akuzuar atë për paragjykime politike dhe për pasqyrim të njëanshëm të realitetit, kryesisht në favor të pikëpamjeve të krahut të majtë.
Pak para njoftimit të Musk, David Sacks, një aleat i tij dhe emëruar së fundmi si komisioner për Inteligjencën Artificiale në administratën e Presidentit Donald Trump, kritikoi përdorimin e përmbajtjes së Wikipedia-s për trajnimin e softuerëve të IA-së.
Emri Grokiipedia vjen nga “Grok”, chatboti i zhvilluar nga xAI, të cilin Musk e ka përshkruar më parë si një “kërkues të së vërtetës në nivelin më të lartë”.
Sipas Musk, ky projekt pritet të sjellë risi në mënyrën si aksesojmë dhe verifikojmë informacionin në internet, duke vendosur një standard të ri në përmbajtjen enciklopedike me ndihmën e inteligjencës artificiale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
