Kur temperaturat ngjiten, humori bie. Shkenca zbulon lidhjen mes vapës dhe nervozizmit

Nëse ndiheni më të irrituar gjatë ditëve përvëluese, nuk jeni vetëm. Një studim i ri sugjeron se moti i nxehtë po ndikon drejtpërdrejt në humorin tonë.

Studiues nga MIT dhe institucione të tjera ndërkombëtare kanë analizuar më shumë se 1 miliard postime në rrjete sociale, duke i lidhur emocionet e njerëzve me temperaturat ekstreme. Rezultatet tregojnë se kur termometri ngjitet mbi 35°C, humori global bie ndjeshëm – veçanërisht në vendet me të ardhura më të ulëta.

Në total, u shqyrtuan 1.2 miliardë postime në X (ish-Twitter) dhe Weibo nga 157 vende. Postimet morën një vlerësim të ndjenjave nga 0.0 (shumë negativ) deri në 1.0 (shumë pozitiv), të lidhura me të dhënat e motit në 2,988 lokacione.

Studiuesit zbuluan se:

-në vendet më të varfra, humori bëhej 25% më negativ gjatë të nxehtit ekstrem;

-në vendet më të pasura, rënia ishte rreth 8%.

“Rrjetet sociale na ofrojnë një dritare të paprecedentë në emocionet njerëzore përtej kulturave dhe kontinenteve,” tha Jianghao Wang nga Akademia e Shkencave të Kinës.

Lexo edhe: Onemor, startupi i themeluar nga Alban Fejzaj, synon të bëhet “Spotify i Fitnesit”

Studimi, i botuar në revistën One Earth, sugjeron se ndikimi i motit në gjendjen shpirtërore është një faktor që duhet marrë parasysh në projeksionet e ardhshme të klimës. Sipas autorëve, ndryshimi i klimës mund të sjellë deri në një ulje 2.3% të humorit global deri në vitin 2100, edhe nëse shoqëritë përshtaten gradualisht.

Nga agresiviteti i rritur, te sjelljet e dhunshme dhe rritja e rasteve të vetëvrasjeve, shkencëtarët paralajmërojnë se efektet emocionale të të nxehtit mund të jenë po aq kritike sa pasojat fizike.

“Është e qartë tashmë se moti ndikon tek humori në shkallë globale,” thotë Nick Obradovich nga MIT. “Ndërsa klima vazhdon të ndryshojë, do të jetë jetike që shoqëritë të ndërtojnë mekanizma për të përballuar edhe goditjet emocionale.”