Në fillim të viteve ’90, kur Shqipëria sapo kishte hapur sytë drejt tregut të lirë, fjala “real estate” tingëllonte si një mister i largët. Por për Lefter Silën, ajo u kthye në një vizion të qartë, një rrugëtim i ndërtuar me intuitë, përpjekje dhe pak fat. Nga një zyrë urbanistike në Gramsh, te krijimi i agjencisë së parë të pasurive të paluajtshme në vend, historia e tij është një rrëfim për guximin për të parë përtej trendit të kohës dhe për të ndërtuar nga e para. Sot, ai jo vetëm ka krijuar një karrierë të gjatë mbi themele të qëndrueshme, por edhe një manual të çmuar për gjithë ata që duan ta kuptojnë dhe te orientohen në tregun e sotëm, një libër autentik me të dhëna dhe analiza reale, që siç e quan ai konsiderohet si ‘abetarja e tregut imobiliar’.
Cili është edukimi juaj dhe si u gjendët në fushën e pasurive të paluajtshme në vitin e largët 1993?
Në fakt, kam lindur dhe jam rritur në Tiranë. Shkollën e mesme e kam kryer në gjimnazin “Qemal Stafa”, ndërsa më pas vazhdova studimet në Fakultetin e Ndërtimit. U diplomova si inxhinier ndërtimi, në një kohë kur vendi kishte nevojë për profesionistë në këtë fushë. Siç ndodhte shpesh në atë kohë, partia më dërgoi në rrethin e Gramshit, ku u emërova përgjegjës i zyrës së urbanistikës dhe projektimit.
Atje u mora me plane urbanistike dhe projekte të ndryshme. Pas rreth shtatë vitesh në Gramsh, u transferova në ish-Ministrinë e Ndërtimit. Aty ndodhi edhe një kthesë interesante në karrierën time, nga inxhinier u bëra gazetar. Fillova të drejtoj revistën “Ndërtuesi”, një botim tremujor i ish-Ministrisë së Ndërtimit.
Ishte një ndryshim i befasishëm, por edhe shumë interesant. Në atë kohë, çdo ministri kishte revistën e saj. Për shembull, Ministria e Bujqësisë kishte “Bujqësia Socialiste”, ajo e Arsimit kishte “Arsimi”, dhe kështu me radhë. Unë udhëtoja nëpër gjithë Shqiperinë për të bërë reportazhe mbi veprat e ndërtimet më të përparuara të kohës.
Por në vitin 1992, revista u mbyll dhe unë mbeta pa punë. U gjenda papritur në një situatë të re dhe vendosa të merrem me procesin e privatizimit të banesave shtetërore që sapo kishte nisur.
Dhe aty mori jetë ideja për të krijuar një agjenci në fushën e pasurive të paluajtshme?
Po. Duke parë që shumë shpejt banesat shtetërore do fillonin të shiteshin e të bliheshin, mendova: “Pse të mos hap një agjenci që merret me këtë proces?”. Ishte diçka krejt e re për Shqipërinë, askush nuk e dinte si funksiononte, as unë vetë, në fakt. Por e ndjeja që kishte ardhur momenti i duhur.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
