Nga Gary Marcus* –Modeli më i fundit dhe më i lavdëruar i OpenAI, i njohur si o3, së fundmi “njoftoi” se unë kisha vdekur. Dhe kjo nuk ishte pjesa më e keqe. Ky model, produkt i viteve të tëra kërkimesh, shkroi një nekrologji të stisur për mua, me kërkesë të një podkasteri që po testonte një nga parashikimet e mia për inteligjencën artificiale. Artikulli përmbante “haluçinacione” të shumta: një citim të trilluar nga pionieri i AI-së, Yoshua Bengio – “Duhet të jemi mirënjohës për kritikët si Gary … na mbajnë të sinqertë për atë që mungon” – dhe një pretendim të rremë se unë kisha debatuar publikisht me Geoffrey Hinton-in, “babain” e inteligjencës artificiale (ai gjithmonë ka refuzuar ftesat e mia).
Është e vërtetë që nekrologjia përmendte disa fakte saktë si doktoraturën time, librat, kompaninë time të AI-së që u ble nga Uber dhe dëshminë që kam dhënë në Senatin Amerikan. Por nëse ka një gjë që e dimë me siguri për modelet gjenerative si o3, Grok apo ChatGPT, është kjo: janë shpesh të mahnitshme, por rrallëherë të besueshme.
Miku im Harry Shearer më tregoi një biografi të krijuar nga AI që e përshkruante si britanik (ndërkohë që ai ka lindur dhe është rritur në Los Anxhelos), dhe i ngatërroi rolin e tij në filmin ‘’This is spinal tap’’ (ai luajti Derek Smalls, jo David Stanhill). Kushdo që i ka përdorur këto mjete, e di sa të zakonshme janë gabime të tilla.
Kur i kërkova ChatGPT-së të më vizatonte një hartë të SHBA-ve dhe të veçonte shtetet me porte dhe të ardhura mbi mesataren, mora disa përgjigje të ndryshme, kontradiktore dhe të gjitha të gabuara. Një hartë e Evropës që më dërgoi specialistja e etikës së AI-së Virginia Dignum ishte edhe më keq.
Asnjë nga këto nuk do t’i habiste kolegët e mi të fushës së AI-së që prej nëntorit 2022, kur doli ChatGPT. Prej vitesh, drejtues të industrisë kanë premtuar se këto gabime do të zhduken (siç na siguroi Reid Hoffman, bashkëthemelues i LinkedIn, në vitin 2023). E megjithatë, pavarësisht qindra miliardë dollarëve investime për të ndërtuar modele gjithnjë e më të fuqishme, gabimet mbeten të zakonshme.
Pse vallë, inteligjenca artificiale gjeneruese është ende kaq e pabesueshme? Shkaqet janë të shumta: të dhëna të dobëta (të përkeqësuara nga individë që shpërndajnë informacion të rremë në internet, si edhe nga vetë prodhimet e modeleve gjenerative), dhe paaftësia e këtyre sistemeve për të kuptuar humorin apo ironinë (si rasti i famshëm kur Google Overviews rekomandoi “të hash një gur të vogël në ditë”, bazuar në një shkrim satirik të ‘’The Onion’’).Por çështja nuk është vetëm tek të dhënat. Problemi më i thellë është ndryshimi mes llogaritjes dhe përafrimit.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
