Kërkesa për çipet e AI-së, Micron shënon rritje marramendëse

Aksionet e Micron Technology u rritën me 2% në tregun parablerje këtë të enjte, pasi kompania e prodhimit të çipave dha një parashikim të fuqishëm për të ardhurat e tremujorit të katërt, të mbështetur nga kërkesa në rritje për çipet e kujtesës që furnizojnë qendrat e të dhënave për inteligjencën artificiale.Micron raportoi një rritje gati 50% në shitjet e çipave të kujtesës me shpejtësi të lartë (HBM) në tremujorin e tretë, krahasuar me tre muajt e mëparshëm. Kompania amerikane është ndër furnizuesit kryesorë të këtyre çipave së bashku me rivalët koreano-jugorë SK Hynix dhe Samsung.

Micron bëri të ditur se do të vazhdojë investimet në çipët HBM, duke reflektuar kërkesën e fuqishme nga gjigantët e çipave të AI si Nvidia dhe AMD, që janë ndër klientët kryesorë të kompanisë.

Sipas J.P. Morgan, pritet që shitjet e çipave HBM nga Micron të rriten ndjeshëm, duke arritur një ritëm të të ardhurave vjetore prej 8 miliardë dollarësh brenda një ose dy tremujorëve të ardhshëm.

Lexo edhe: Zuckerberg ‘rrëmben’ tre punonjës të OpenAI mes një gare për talentet e AI-së

Ndërsa ndikimi i tarifave tregtare ishte relativisht modest në këtë tremujor, sipas Sumit Sadana, shef i biznesit në Micron, analistët e Morgan Stanley theksuan se pranimi i faktorëve tariforë nga drejtuesit e kompanisë shihet si një element pozitiv, edhe pse nuk mendohet të jetë arsyeja kryesore për performancën e fortë të kohëve të fundit.

Pas rezultateve të publikuara, të paktën 10 firma ndërmjetësimi rritën objektivat e tyre për çmimin e aksioneve të Micron.

Aksionet e kompanive rivale si AMD, Nvidia dhe Marvell Technology shënuan gjithashtu rritje me 1 deri në 3% në tregun parablerje.

Micron ka regjistruar një rritje prej 51.2% që nga fillimi i vitit, krahasuar me rritjen 19% të AMD-së dhe 15% të Nvidia-s. Në terma vlerësimi, Micron ka një raport çmim/fitim për 12 muajt e ardhshëm prej 11.85, krahasuar me 6.48 për SK Hynix dhe 11.57 për Samsung.

Reuters