“Jam shumë krenar që çdo gjë e kam nisur me 0 lekë”/ Genti Zotaj në Business Key

Nga Adelina Onuzi

Në botën e biznesit, ku shumëkush pret momentin ideal për të filluar, Genti Zotaj ka një filozofi tjetër: “Suksesi i çdo njeriu fillon me guximin.” Në rubrikën “Business Key”, eksplorojmë rrugëtimin e një sipërmarrësi që la pas “luksin” e jetës korporative dhe vendosi të ndërtojë diçka krejtësisht të tijën, me shumë sfida, pak gjumë dhe një pasion të pakufishëm.

 

View this post on Instagram

 

A post shared by Business Magazine Albania (@businessmag.al)

Në vitin 2014, Genti dha dorëheqjen nga një karrierë ndërkombëtare në bankë, duke braktisur udhëtimet në hotele me pesë yje dhe jetën e rrëmujshme të korporatave globale për të themeluar Greenleaf, një kompani që sot është sinonim i inovacionit dhe krijimit të vlerës në biznesin shqiptar dhe më gjerë.

Ai tregon se nuk ka ekzistuar një “kuti” ku të futej dhe asnjë limit që e ndalonte të ëndërronte më larg. Njëkohësisht, rruga e tij nuk ka qenë e lehtë: “Ngrihesha në orën katër të mëngjesit, punoja për projektin tim, pastaj shkoja në bankë.”

Për Gentin, të jesh udhëheqës nuk do të thotë vetëm të kesh titullin “bosi”. Duhet të jesh aty ku është nevoja në secilin moment. Me një maturi të rrallë, Genti nxjerrë në pah se vizioni dhe vendosmëria janë thelbësore për çdo sukses.

Genti na kujton se momentin e duhur duhet ta krijosh vetë. Ai na mëson se çelësi është të marrësh guximin për të nisur dhe të mos ndalesh, edhe kur rruga duket e pasigurt.

Business Key sjell histori si e Gentit, për të frymëzuar brezin e ri të sipërmarrësve shqiptarë që të guxojnë, të reflektojnë dhe të ndërtojnë të ardhmen e tyre.

Në fund të fundit, rruga e Gentit Zotaj nuk është vetëm një tregim për një sukses biznesi, është një ftesë për të gjithë ne që të dalim nga “kutitë” tona, të bëjmë zgjedhje të guximshme dhe të krijojmë diçka të jashtëzakonshme.