Taksia e parë fluturuese në historinë e Britanisë ka përfunduar me sukses udhëtimin e saj të parë, ndërsa qeveria ka shpallur mbështetjen për të sjellë këtë shërbim novator në përdorim deri në vitin 2028. Prototipi i avionit elektrik VX4, i ndërtuar nga kompania Vertical Aerospace me seli në Bristol, është i pari në Evropë që realizon një fluturim ndërqytetës në hapësirën ajrore normale, jashtë kushteve të testimit.
Avioni përmban një pilot dhe mund të transportojë deri në katër pasagjerë, me një shpejtësi maksimale prej 240 km/h dhe një autonomi fluturimi prej 160 kilometrash.
Muajin e kaluar, qeveria britanike njoftoi një financim prej 20 milionë paundësh për të nxitur zhvillimin e dronëve komercialë dhe shërbimeve me taksi fluturuese. Për të përshpejtuar procesin, Departamenti për Transportin dhe Autoriteti i Aviacionit Civil do të asistohen nga një Zyrë e re për Inovacion Rregullator, me qëllim shkurtimin e burokracive dhe sjelljen më të shpejtë të teknologjisë tek publiku.
Simon Davies, piloti kryesor i testimeve, u shpreh: “Të shihje avionin duke u ngritur nga pista dhe duke fluturuar mbi Cotswolds ishte një moment i veçantë dhe një kulm karriere për mua. Të gjitha parashikimet tona për performancën u konfirmuan plotësisht. Jo të gjithë avionët janë kënaqësi për t’u pilotuar edhe pse janë të sigurt. Por VX4 ishte jo vetëm i sigurt, por edhe kënaqësi absolute për ta pilotuar – reagues, i qetë, i thjeshtë për t’u komanduar, dhe me zhurmë minimale në kabinë. Një nder i vërtetë.”
Lexo edhe: Elon Musk largohet përfundimisht nga administrata Trump
Sipas ekspertëve të industrisë, taksitë fluturuese pritet të përmirësojnë ndjeshëm lidhjen mes zonave urbane në Mbretërinë e Bashkuar; një udhëtim nga Brighton drejt aeroportit Heathrow, për shembull, do të zgjaste vetëm 20 minuta.
Në mars, kompania amerikane Joby Aviation njoftoi bashkëpunimin me Virgin Atlantic, duke shpallur planet për të ofruar “udhëtime pa emetime, të shkurtra dhe të shpejta nëpër Mbretërinë e Bashkuar”, duke filluar me nyje fluturimi në aeroportet Heathrow dhe Manchester.
Avioni elektrik i Joby është projektuar për të mbajtur një pilot dhe deri në katër pasagjerë, me një shpejtësi maksimale prej 320 km/h.
Deputetja laburiste Alice Macdonald përmendi një projekt në Aeroportin e Norwich që synon të kthejë East Anglia në “zemrën e inovacionit të aviacionit” dhe ftoi ministrin për transportin që “të provojë vetë një fluturim me avion elektrik”.
Ndërkohë, ministri për transportin Mike Kane theksoi përpara deputetëve angazhimin e qeverisë për të “maksimizuar përfitimet që ofron teknologjia e fluturimeve të së ardhmes, përfshirë taksitë fluturuese”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
