Një ndërprerje gjigante e energjisë elektrike ka lënë pa drita pjesë të mëdha të Spanjës dhe Portugalisë, duke çaktivizuar semaforët dhe shkaktuar kaos në aeroporte, stacione trenash dhe rrugë. Operatori i rrjetit elektrik të Portugalisë, Redes Energéticas Nacionais (REN), deklaroi se furnizimi me energji u ndërpre në të gjithë Gadishullin Iberik dhe në disa rajone të Francës, në orët e para të mesditës së së hënës. Ndërkohë, operatori spanjoll Red Eléctrica bëri të ditur se po punon së bashku me kompanitë energjetike për të rikthyer furnizimin, pjesërisht të rikuperuar në veri dhe jug deri në pasdite. “Shkaqet po analizohen dhe të gjitha burimet janë angazhuar për zgjidhjen e situatës”, njoftoi kompania.
Ndërprerja zhduku ekranet, ndriçimin dhe prizat në të gjithë rajonin; Policia portugeze u bëri thirrje qytetarëve të shmangnin udhëtimet e panevojshme, pasi semaforët ishin jashtë funksioni. “Ulni shpejtësinë dhe kushtoni vëmendje maksimale,” apeluan autoritetet. “Prioriteti është drejtimi i sigurt: qetësia juaj shpëton jetë.”
Në Madrid, trafiku u rëndua ndjeshëm pas shuarjes së semaforëve.
“Isha duke ngarë makinën dhe papritur gjithçka u errësua… U bë një xhungël e vërtetë,” tregoi Luis Ibáñez Jiménez për CNN. “Pashë një autobus gjigant që po afrohej me shpejtësi dhe u detyrova të përshpejtoja shumë për t’i shpëtuar.”
Edhe turneu i madh i tenisit, Madrid Open, u ndërpre, ndërsa spektatorët u shpërndanë në errësirë.
Lexo edhe: Rreziku i ri në rekrutim, kandidatë të sajuar nga AI po pushtojnë intervistat
Shkaku i kësaj errësire të papritur mbetet ende i paqartë megjithëse në mediat sociale flitet edhe për sulm kibernetik. Kryebashkiaku i Madridit, José Luis Martinez Almeida, kërkoi nga qytetarët të minimizonin lëvizjet dhe të telefononin shërbimet e emergjencës vetëm për raste vërtet urgjente. Ai gjithashtu kërkoi që rrugët të liroheshin për ekipet e emergjencës.
Në aeroportet kryesore të rajonit, fluturimet u vonuan ose u anuluan në mënyrë të menjëhershme, ndërsa udhëtarët përpiqeshin të përshtateshin me situatën.
Ellie Kenny, një turiste në aeroportin Humberto Delgado të Lisbonës, tregoi për CNN se qindra njerëz qëndronin në errësirë në radhë, pa kondicioner dhe pa ujë të rrjedhshëm. Dyqanet pranonin pagesa vetëm në para, tha ajo.
Sipas faqeve online të monitorimit të fluturimeve, shumë aeroporte ndaluan papritur nisjet rreth mesditës.
Operatori spanjoll i trenave, Renfe, njoftoi se trenat ndaluan dhe nisjet u anuluan. Brenda tuneleve të metrosë, pasagjerët mbetën në errësirë të plotë. Video të postuara në rrjetet sociale tregonin vagonë metroje të zhytur në terr, të bllokuar nëpër stacione të Madridit, ku shërbimi i metrosë u pezullua dhe hyrjet në stacione u mbyllën me shirit sigurie.
Burimi: CNN/ Përshtati: Businessmag.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
