Të hënën e 4 marsit u mbajt një takim i organizuar nga Wizz Air dhe Aeroporti Ndërkombëtar i Tiranës (TIA), të cilët ndanë me përfaqësuesit e medias një analizë të thelluar mbi zhvillimet e fundit në sektorin e aviacionit, destinacionet e reja dhe përgatitjet për rritjen e trafikut ajror në Shqipëri.
Drejtori Operacional i TIA nënvizoi faktin se Shqipëria po tërheq gjithnjë e më shumë turistë nga e gjithë bota, duke e përmendur pjesëmarrjen e saj si vend mikpritës në ITB Berlin, një nga panairet më të mëdha të turizmit global.
View this post on Instagram
“Vitin e kaluar kemi regjistruar 10.7 milionë pasagjerë dhe më shumë se 11 milionë mbërritje të turistëve të huaj. Për këtë vit synojmë të arrijmë shifrën e 12 milionëve dhe jemi të përgatitur për këtë rritje. Aktualisht, aeroporti po kalon nëpër një fazë zgjerimi për të përballuar deri në 15 milionë pasagjerë në vit,” theksoi ai.
Në aspektin e destinacioneve të reja, ai zbuloi se po diskutohen fluturime direkte me shtetet aziatike si Kazakistani dhe Kirgistani, ndërsa këtë vit do të rikthehen fluturimet çarter nga Izraeli. Po ashtu, do të zgjerohet lidhja me rajonin Baltik, duke shtuar fluturime drejt Talinit dhe Vilniusit. Ndërkohë, linjat ekzistuese po forcohen me operatorë të rinj, përfshirë Vueling, që do të ofrojë lidhje më të mira përmes Barcelonës drejt gadishullit Iberik.
Nga ana tjetër, Anastasia Novak, përfaqësuese e Wizz Air, konfirmoi pozicionin e fortë të kompanisë në tregun shqiptar, duke zotëruar 58% të tij.
View this post on Instagram
“Këtë verë planifikojmë të transportojmë 4.4 milionë pasagjerë dhe do të ofrojmë 46 destinacione të reja. Shqiptarët dhe turistët mund të zgjedhin mes destinacioneve të njohura si Italia, Greqia dhe Spanja, por edhe opsione të reja si Norvegjia, Anglia dhe Polonia,” tha Novak.
Ajo theksoi se suksesi i Wizz Air në Shqipëri është rezultat i strategjisë së tyre për të ofruar fluturime me kosto të ulët dhe destinacione të larmishme, duke e bërë Shqipërinë një pikë kyçe në rrjetin e tyre evropian.
Takimi u mbyll me një sesion interaktiv, ku përfaqësues të ndryshëm nga media dhe industria diskutuan ide për bashkëpunime të ardhshme dhe strategji për ta promovuar Shqipërinë si një destinacion turistik të qëndrueshëm dhe të arritshëm përmes fluturimeve të reja.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
