Me siguri jeni të njohur me yndyrën e bardhë, llojin më të përhapur të yndyrës në trupin tonë. Yndyra e bardhë shërben si burim kryesor energjie dhe na mbron nga goditjet, por edhe barku i fryrë dhe kofshët e mbushura rrisin ndjeshëm rrezikun për diabetin e Tipit 2 dhe sëmundjet e zemrës.
Yndyra kafe është një lloj më pak i njohur, por konsiderohet si një lloj më i mirë yndyre. Ajo djeg kalori për të prodhuar nxehtësi kur ekspozohemi ndaj temperaturave të ulëta dhe ndihmon në rregullimin e metabolizmit. Shkencëtarët nga Shkolla Mjekësore Rutgers në New Jersey thonë se yndyra kafe mund të përmirësojë performancën gjatë ushtrimeve dhe të promovojë jetëgjatësinë. “Hipoteza jonë është se [yndyra kafe] mbron kundër … obezitetit, diabetit, çrregullimeve kardiovaskulare, kancerit, sëmundjes së Alzheimerit dhe tolerancës së reduktuar ndaj ushtrimeve,” shkruan studiuesit së fundmi në revistën Aging. Fatkeqësisht, ne nuk kemi shumë yndyrë kafe — dhe nuk mund të krijojmë më shumë prej saj. Në lindje, yndyra kafe përqendrohet në shpinë, qafë dhe supe. Me kalimin e moshës, këto qeliza shpërndahen në depo të vogla rreth qafës, veshkave, gjëndrave mbiveshkore, zemrës dhe kraharorit.
Lexo edhe:Jepini përparësi mirëqenies suaj ndërsa ndërtoni biznesin tuaj- Disa këshilla nga Andy Dunn
Njerëzit e hollë priren të kenë më shumë yndyrë kafe sesa ata që janë mbipeshë. Ne mund ta aktivizojmë yndyrën kafe që kemi me një dush të ftohtë ose një banjë me akull. Ushqimet pikante, çaji jeshil dhe mollët gjithashtu kanë treguar potencial. Ushtrimet sinjalizojnë yndyrën kafe që të djegë më shumë kalori sepse aktiviteti fizik stimulon sistemin tonë nervor simpatik — i njohur gjithashtu si përgjigjja jonë “lufto ose ik”. Një studim zbuloi se aktiviteti i yndyrës kafe u rrit te minjtë që vraponin në rutine për gjashtë deri në tetë javë. Shkencëtarët e Rutgers vunë re se shumica e kërkimeve mbi këtë temë përqendrohen në mënyrën se si ushtrimet rregullojnë yndyrën kafe dhe jo anasjelltas. Ata përmendën një studim që përfshinte transplantimin e yndyrës kafe nga minj të modifikuar gjenetikisht te minj të zakonshëm. Marrësit treguan përmirësim në qëndrueshmërinë gjatë vrapimit vetëm tre ditë pas transplantimit. Yndyra kafe nga minjtë e pa modifikuar gjenetikisht kërkonte më shumë kohë për të dhënë rezultate të ngjashme. Studiuesit e Rutgers thanë se yndyra kafe mund të ndihmojë gjithashtu në luftimin e humbjes së muskujve të lidhur me moshën, lodhjes dhe rënies së metabolizmit duke përmirësuar qarkullimin e gjakut dhe reduktuar stresin qelizor. Ata sugjerojnë zhvillimin e trajtimeve që imitojnë përfitimet e yndyrës kafe për të përmirësuar energjinë, mirëmbajtjen e peshës dhe shëndetin e zemrës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
