Viti 2022 ka vendosur rekorde të reja për turizmin shqiptar. Sipas të dhënave të Bankës së Shqipërisë, për 6-mujorin e parë prurjet e turistëve të huaj llogariten në 1.13 miliardë euro, mbi 440 milionë euro më shumë, krahasuar me të njëjtën periudhë të vitit të shkuar.
Të ardhurat nga turizmi rezultojnë të jenë më të larta edhe se 6-mujori i vitit 2019, që cilësohet edhe si viti më i mirë për sektorin e turizmit, ku gjatë gjtihë vitit turistët sollën mbi 2 miliardë euro.
Jo vetëm në të ardhurat e gjeneruara, por edhe në numër shifrat e turistëve kanë qenë të larta këtë periudhë. Sipas INSTAT, në 7-mujorin e këtij viti kanë hyrë në vend mbi 3.9 milionë vizitorë të huaj, 40% më shumë se e njëjta periudhë e vitit që lamë pas.
Lexo edhe: “The Independent”: Shqipëria një nga sekretet e ruajtura më mirë në Europë
Sipas Bankës së Shqipërisë, rritja e shpenzimeve nga turistët këtë periudhë është ndikuar edhe nga eventet sportive dhe kulturore të zhvilluara në vendin tonë, veçanërisht finalja e Conference League që solli tifozë e vizitorë të shumtë në vend duke dhënë ndikim jo të vogël aktivitetet e lidhura me turizmin.
Nga ana tjetër, edhe shqiptarët që udhëtojnë jashtë vendit kanë rritur shpenzimet, duke bërë që vetëm në pjesën e parë të vitit të shpenzojnë përtej kufijve 794 milionë euro, rreth 395 milionë euro më shumë ndaj një viti më parë. Kjo për shkak edhe të zbutjes së kufizimeve të pandemisë nga shtetet e huaja përmes lehtësimit të lëvizjes së njerëzve.
Prej janarit e deri në fund të korrikut, rreth 3 milionë shqiptarë që kanë dalë jashtë vendit sipas INSTAT, mbi 40% krahasuar më vitin e kaluar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
