Të kultivosh dhe të promovosh optimizmin nuk është thjesht një qëndrim emocional pozitiv, është një faktor i rëndësishëm për mirëqenien tonë. Përtej faktit që na bën të ndihemi më mirë, mendimi pozitiv lidhet drejtpërdrejt me përfitime konkrete shëndetësore: nga përmirësimi i shëndetit kardiovaskular, te aftësi më të mira për të përballuar stresin dhe sfidat e jetës.
Lajmi i mirë? Optimizmi nuk është vetëm një tipar i lindur. Edhe ata që priren të shohin gjithmonë “gotën gjysmë bosh” mund të zhvillojnë një perspektivë më pozitive. Duke praktikuar në mënyrë të vazhdueshme ushtrime dhe teknika të mbështetura nga shkenca, mendimi pozitiv mund të kthehet në një zakon. Më poshtë gjeni pesë metoda efektive për ta arritur këtë.
1. Sfido dialogun e brendshëm negativ
Pothuajse të gjithë kemi përjetuar zërin e brendshëm kritik që na nënvlerëson. Por për shumë njerëz, ky dialog negativ ndërhyn çdo ditë në ndjenjën e lumturisë. Sipas Mayo Clinic, mendimi negativ shpesh përfshin ekzagjerimin e situatave të vogla, përqendrimin vetëm tek e keqja dhe ruminimin mbi gjëra që “duhej t’i kishim bërë ndryshe”. Një mënyrë praktike për ta luftuar këtë është të imagjinoni sikur ato mendime po i përjeton një mik shumë i afërt ose një anëtar i familjes. Si do t’i flisnit atij personi? “Bëhet fjalë për të përdorur të njëjtin gjuhë të butë dhe të kujdesshme që përdorim për njerëzit që duam, edhe ndaj vetes,” shpjegon psikologia klinike Joy Harden Bradford. “Edhe ne jemi njerëz që meritojmë mirëkuptim dhe dashuri.” Nëse një mik do t’ju thoshte: “Nuk do të arrij kurrë asgjë” apo “Nuk e meritoj të jem i lumtur”, me siguri do ta qetësonit dhe do ta kundërshtonit atë bindje. Filloni të bëni të njëjtën gjë me veten tuaj.
Lexo edhe: Kanadaja dhe Shqipëria hapin qiejt: Një marrëveshje historike për transportin ajror
2. Gjej humor në situata të vështira
Të qeshurit nuk është vetëm i këndshëm, është edhe i dobishëm për shëndetin. Studime të ndryshme tregojnë se humori ndihmon në përmirësimin e gjendjes emocionale dhe në uljen e stresit. Herën tjetër që ndiheni të irrituar nga një radhë e gjatë apo një situatë e sikletshme në punë, provoni ta shihni me humor. Edhe të qeshurit “me zor”, sipas studimeve, mund të ndikojë pozitivisht në humor. Të gjesh një moment lehtësie në situata të bezdisshme është një mënyrë e thjeshtë për të ushqyer një këndvështrim më optimist.
3. Zhvillo një “mentalitet të rritjes”
Koncepti i “growth mindset” (mentalitet i rritjes) është zhvilluar nga psikologia amerikane Carol Dweck dhe u bë i njohur përmes librit të saj Mindset: The New Psychology of Success. Ky mentalitet nënkupton të shohësh sfidat dhe pengesat si mundësi për t’u rritur dhe mësuar, jo si kufizime të përhershme. Fillimi është më i thjeshtë nga sa duket: gjithçka nis me gjuhën që përdorim.
Një shembull i thjeshtë:
- “Nuk jam i/e mirë në yoga”
- “Nuk jam i/e mirë në yoga ende”
Fjala “ende” hap mundësinë e përmirësimit dhe e zhvendos mendimin nga një gjendje fikse drejt zhvillimit të vazhdueshëm.
4. Përdor pohime pozitive (Affirmations)
Pohimet pozitive janë fjali të shkurtra dhe inkurajuese që i përsërisim rregullisht për veten. Një studim i vitit 2014 tregon se pohimet e përdorura në momentin e duhur mund të përmirësojnë rezultatet në arsim, shëndet dhe marrëdhënie – dhe efektet e tyre mund të zgjasin për muaj apo edhe vite. Megjithatë, pohimet duhet të jenë të vërteta dhe të personalizuara. Shmangni deklarata shumë të përgjithshme si “Unë jam perfekt”. Në vend të kësaj, fokusohuni në vlera reale që ju përfaqësojnë. “Qëllimi është të inkurajoni veten në mënyrë autentike, me fjalë që përputhen me të vërtetën tuaj personale,” shpjegojnë ekspertët e shëndetit mendor.
5. Ushtrimi “Tre gjëra të mira”
Praktikimi i mirënjohjes është i njohur për përfitimet e tij fizike dhe mendore. Por kur jemi në një gjendje të vështirë emocionale, të ndihesh mirënjohës nuk është gjithmonë e lehtë. Këtu hyn në lojë ushtrimi “Tre Gjëra të Mira”. Ai konsiston në të ndarë 10 minuta në ditë, për një javë, për të reflektuar mbi tre gjëra pozitive që ju kanë ndodhur ose për të cilat ndiheni mirënjohës. Ky ushtrim i thjeshtë ndihmon trurin të zhvendosë fokusin nga problemet tek aspektet pozitive të jetës, duke ndërtuar gradualisht një mendësi më optimiste.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
