Vilma Zenelaj dhe Greta Zenelaj janë dy kineaste shqiptaro-amerikane nga Vlora që prej disa vitesh jetojnë dhe punojnë në Los Angeles, ku kanë ndërtuar një karrierë të fortë në industrinë e filmit në SHBA. Ato janë themeluese të kompanisë filmike Colored Films LLC, e njohur si një nga kompanitë e para shqiptare të prodhimit në Hollywood.
Vilma, regjisore dhe shkrimtarë skenari, dhe Greta, aktore, shkrimtare dhe producente, filluan rrugëtimin e tyre artistik me projekte të pavarura si komedia “What Do I Do Now?” dhe trilleri “In the Woods”, të cilët janë shfaqur në festivale ndërkombëtare dhe kanë fituar çmime të ndryshme.
Lexo edhe:Shkencëtarët kinezë arrijnë kthimin e diabetit të tipit 1 dhe 2 drejt funksionimit normal
Sot, motrat po përgatisin një projekt ambicioz të quajtur “Gonxhe”, një film artistik që synon të rrëfejë histori jo të treguar më parë për fëmijërinë e Nënë Terezës, Anjezë Gonxhe Bojaxhiu, përpara se ajo të bëhej misionare në Indi. Ky projekt ka qenë në zhvillim nga ekipi i Colored Films dhe është i fokusuar te formimi, ndikimi familjar dhe rritja shpirtërore që e bënë Nënë Terezën figurë të shquar botërore.
Në intervista për media ndërkombëtare, Vilma dhe Greta kanë shpjeguar se ideja lindi nga dëshira për të treguar një aspekt më pak të njohur të jetës së saj, fëmijërinë, pasi shumica e filmave ekzistues për Nënë Terezën fokusohen kryesisht te misioni i saj në Kalkutë.
Kineastet shpjegojnë se “Gonxhe” synon të jetë një film “coming-of-age” që sjell perspektivën e fëmijërisë së saj, të sfidave dhe ndikimit të familjes, duke ofruar një pamje më të thellë dhe njerëzore të historisë së kësaj figure ikonë.
Aktualisht projektit po i bëhet faza përgatitore dhe po mendohet për lokacione xhirimi si Shkupi dhe Shkodra, vende që sipas tyre ofrojnë peizazhe autentike historike dhe reflektuan periudhën e rritjes së Anjezës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
