Të rinjtë e Kosovës tashmë kanë një libër për orientimin në karrierë


Libri “Orientim në Karrierë”, synon t’i vetëdijësojë studentët e të rinjtë, por edhe profesorët e institucionet publike, për rëndësinë e orientimit në karrierë. Ky libër është i shkurtër, praktik, dhe i lehtë për t’u përvetësuar. Ju rekomandoj ta lexoni, veçanërisht ju studentë të cilët jeni duke bërë plane për karrierën tuaj. Në këtë intervistë do të mësoni më shumë rreth librit dhe Gentianit, autorit të tij.

Si erdhi ideja për të shkruar një libër për orientimin në karrierë?

Kam punuar për çështjen e orientimit në karrierë prej dhjetë vitesh me më shumë se 1000 nxënës të shkollave të mesme, studentë dhe programe të OJQ-ve. Gjatë përgatitjeve të këtyre trajnimeve dhe punëtorive kam vërejtur mungesën e materialeve rreth kësaj fushe. Madje në gjuhën shqipe ky libër është i pari në formatin e shtypur dhe deri më tani i vetmi.

Duke qenë unë vetë autor i materialeve të këtyre trajnimeve dhe punëtorive, kam ndjerë obligim moral që të lëvizim më konkretisht në këtë fushë. Nga studimi i kësaj fushe dhe gjithmonë nga përvoja praktike, kam ardhur me një teori të veprimit për orientim në karrierë. Nuk mundet orientimi në karrierë të zhvillohet pa u paraprirë nga zhvillimi i avancuar i të menduarit. Prandaj, në pjesën e parë të librit kam sjellë kapituj të veçantë që nxisin dhe zhvillojnë të menduarit e thellë, mendimin kritik, dilema morale e të ngjashme. Gjithnjë me aktivitete dhe shembuj konkretë. Dhe pasi të mund ta kem frymëzuar mendimin për jetën, karrierën dhe botën në përgjithësi, atëherë mund të vijohet me aktivitete. Fillimisht të njohjes së vlerave të vetvetes, njohjes me alternativat dhe hap pas hapi deri te përcaktimi i objektivave dhe karrierës përkatëse. Pastaj në pjesën e fundit të librit kam sjell materiale konkrete dhe shabllone origjinale për disa nga shkathtësitë akademike të nevojshme në çdo fushë veprimi.

Ju keni thënë se libri mund të përdoret në planprogramin arsimor si dhe në kuadër të organizatave joqeveritare, sa është interesimi i këtyre institucioneve për të aplikuar metodologjinë e orientimit në karrierë?

Libri është ndërtuar që të jetë i përshtatshëm për përdorim shkollor, me instruksione nga mësimdhënësi apo trajneri. E vërteta është se prej kur organizata ‘Identiteti’ ka iniciuar kërkesën për përfshirjen e kësaj lënde në shkollat publike, që prej atëherë ka lëvizje edhe nga institucionet publike dhe organizatat e huaja në Kosovë. Por, këto nisma duken ‘të pa orientuara’, në kuptimin që nuk kanë ndonjë plan specifik të nisjes, zhvillimit, monitorimit dhe përcaktimit në karrierë. Gjithsesi, secila nga këto nisma prek një pjesë nga ajo që do të mund të quhej orientim në karrierë. Këtyre nismave fatmirësisht nuk u mungon përkrahja financiare.

Sipas teje, sa ka interesim nga rinia e Kosovës për t’u përgatitur për rrugëtimin e tyre në karrierë?

Së fundi, kam parë interesim pak më të lart se zakonisht. Të rinjtë deri në moshën 29 vjeҫ janë shumë të përqendruar në orientimin e karrierës. Fatkeqësisht ka një presion familjar mbi nxënësit që në shkollën fillore për përzgjedhje të drejtimit në shkollë të mesme dhe pastaj për fakultet. Pra, këto metoda apo “tradita” jo domosdo ndikojnë pozitivisht për orientimin në karrierë.

Njeriu ka aftësi dhe vlera për më shumë se një fushë, prandaj orientimi, riorientimi, zhvillimi i mëvonshëm për një karrierë të re është plotësisht diҫka normale.

Cili është mesazhi yt për studentët dhe të rinjtë e Kosovës?

Nëse nuk lexoni dhe veproni sot, pasojat do t’i vuajë e gjithë shoqëria jonë pas 20 vitesh. Brenda kësaj shoqërie do të jetoni ju dhe pasardhësit tuaj.

Le ta marrim si maksimë moton e alpinistëve ‘Kurrë mos shiko poshtë se rrëzohesh’. Ndaj, edhe ne të rinjtë të mos ndikohemi nga realiteti i zymtë që ka rezultuar nga politikanët tanë të 20 vjeçarit të parë, por le të shikojmë lart se duke u zhvilluar në karrierë, me dinjitet dhe etikë, lëvizje konkrete në punë, ne mund ta bëjmë vendin tonë të suksesshëm për pak vite.

Na thuaj diçka për veten, çfarë bën, çfarë ke studiuar?

Unë vij nga Ferizaji, kam studiuar filologjinë (gjuhë dhe letërsi angleze), teologjinë dhe menaxhimin në edukimin formal. Por, në mënyrë joformale, studimet i kam zgjeruar edhe në fusha të tjera. Kam punuar si mësimdhënës i gjuhës angleze dhe etikës në disa shkolla publike të Ferizajt dhe Gjilanit, pastaj si trajner dhe folës në aktivitete motivuese në Ferizaj, kryesisht përmes Qendrës për Motivim, Karrierë dhe Sukses ‘Identiteti’ në Ferizaj. Kjo është një nismë që e kam themeluar para 5 vitesh me një grup të rinjsh. Madje, pikërisht me këtë grup të rinjsh dhe profesionistësh kam iniciuar urgjencën dhe masivizimin e çështjes së Orientimit në Karrierë, duke kërkuar përfshirjen e një lënde të veçantë në shkolla për orientim në karrierë. Aktualisht drejtoj sektorin për arsim në Këshillin e Bashkësisë Islame në Ferizaj dhe mekanizmin e këtij sektori, Akademinë e Studimeve të PNFBI. Faleminderit shumë për interesimin, urime të gjithë besimtarëve muslimanë, muajin e shenjtë të Ramazanit.

 

Must watch
Business Mag Nr. #23 - Qershor 2020

Të gjitha planet tuaja për këtë vit, si individë apo sipërmarrës mund të jenë përmbysur. Mbërritja e Coronavirusit në Shqipëri paralizoi gjithçka, ashtu si kudo. Në mënyrë të papritur na vuri në kushte tërësisht të tjera pune, na shtoi pasigurinë e shqetësimin për të ardhmen.

Sipërmarrjet, kryesisht në fushën e IT u përshtatën më shpejt, duke angazhuar punonjësit nga shtëpia. Ato zhvilluan dhe më tej mundësitë për të punuar në distancë, ndërkohë që shumë kompani të tjera u mbyllën plotësisht.

Kjo është një periudhë sprove, për individin, drejtuesit dhe liderin. Kjo është lufta që po zhvillohet në spitale dhe fronti i parë i saj janë mjekë, infermierë e sanitarë. Historia e ekonomisë k a treguar se gjithmonë pas një situatë të vështirë ka një ringritje. Dhe ne besojmë se kështu do të jetë.

Deri atëhërë ajo çka na mbetet të bëjmë është respektimi i rregullave të kërkuara, marrja e përgjegjësive ndaj të tretëve për aq sa mundemi, e të interesohemi për të pamundurit, të ndajmë diçka për ta.

Solidariteti nuk ka munguar e nuk do të na mungojë as kësaj radhe. Ajo çfarë doli në pah krahas solidaritetit ishte varfëria: e shtetit, e kompanive dhe e vetë individëve.

Një ditë pas dërgimit të 30 bluzave të bardha në Itali, The Guardian na vlerësoi në artikullin e saj si zemërgjerë edhe pse Ky numër ishte planifikuar të botohej në Prill 2020, por procesi u shty për shkak të masave të ndërmarra si pasojë e shpërthimit të Covid-19. Edhe pse në kohë vështirësish, jemi …

Shiko më shumë
Na ndiqni në rrjetet sociale