Nga janari 2026, sistemi i taksimit mbi pronën do të hyjë në një fazë të re. Deri më sot, pronarët e banesave të dyta apo të treta paguanin një shumë fikse, por tashmë barra fiskale do të llogaritet mbi përqindjen e vlerës së tregut të pasurisë. Ky ndryshim, sipas ekspertit të pasurive të paluajtshme Amarildo Sterkaj, ka nisur të ndihet që tani në sjelljen e tregut.
“Shumë pronarë po shqyrtojnë mundësinë e shitjes së pronave që nuk i përdorin, ndërsa blerësit janë bërë më të kujdesshëm, duke llogaritur edhe koston e re të mbajtjes së një prone. Si pasojë, ritmi i transaksioneve është ngadalësuar, megjithëse çmimet nuk kanë pësuar rënie të ndjeshme për shkak të kërkesës së lartë”, – shpjegon Sterkaj.Efekti tek bizneset dhe qiratë komerciale
Një tjetër dimension i reformës fiskale lidhet me bizneset dhe hapësirat komerciale. Sipas Sterkajt, taksa e re do të përkthehet në një barrë shtesë financiare, e cila me shumë gjasë do të reflektohet në rritjen e qirave.
“Kjo situatë pritet të rëndojë veçanërisht tek bizneset e vogla, të cilat tashmë operojnë me fitime të kufizuara”, – thekson ai.
Rritja e qirave, sipas ekspertëve të tregut, mund të sjellë dy pasoja: tkurrjen e hapësirës së biznesit të vogël në qendra urbane dhe rritjen e presionit mbi konsumatorin final, përmes çmimeve më të larta të shërbimeve apo produkteve.
Lexo edhe: Shqiptarët po heqin dorë nga paraja fizike? Rriten veprimet me karta bankare
Domosdoshmëria e rivlerësimit të pasurive
Sterkaj ngre gjithashtu shqetësimin për bazën mbi të cilën do të aplikohet taksa. Sipas tij, të dhënat e Censit 2023 tregojnë se mbi dy të tretat e banesave në vend janë më të vjetra se 25 vjet.
“Ky realitet e bën të domosdoshëm një proces rivlerësimi përpara aplikimit të taksës, në mënyrë që ajo të bazohet mbi vlerën reale të tregut. Një rivlerësim i tillë do të rrisë transparencën dhe do të ndihmojë në krijimin e një tregu më të drejtë për të gjithë”, – shton ai.
Ndryshimi i taksimit mbi pronën është një ndër reformat më të ndjeshme që prek drejtpërdrejt qytetarët, bizneset dhe tregun imobiliar në tërësi. Edhe pse efektet e para kanë nisur të ndihen, mbetet për t’u parë nëse politika e re fiskale do të arrijë të balancojë nevojën e shtetit për të ardhura më të qëndrueshme me stabilitetin e tregut dhe aftësinë paguese të qytetarëve.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
