Kontaminimi nga ushqimet është në nivele shumë më të larta se ato që mendojmë. Vlerësimet ndërkombëtare tregojnë se një në 50 veta është i kontaminuar nga ushqimi. Në kuadër të panairit “Klik Ekspo Klik” që po mbahet këto ditë në Tiranë, AGA Academy zhvilloi një forum për sigurinë ushqimore, ku u diskutua mes prodhuesish, tregtarësh, shoqata konsumatorësh, universitete dhe përfaqësues të higjienës sanitare.
Pjesëmarrësit theksuan nevojën e rritjes së përgjegjësisë edhe ligjore të teknologëve nëpër sipëmarrje, rritjen e edukimit në masë të popullsisë për standardet ushqimore, si dhe një kontroll dhe koordinim më të mirë të të gjithë zinxhirit: lëndë e parë, përpunim, prodhim, transport, ruajtje dhe tregti. Përpunuesit ngritën shqetësimin se standardet e sigurisë duhet të ruhen në të gjitha hallkat, përfshirë ruajtjen në pikat e shitjes (markete-supermarkete).
Linda Dervishaj, administratore e AGA Academy, e cila moderoi panelet e forumit, ngriti shqetësimin e pasigurisë së konsumatorit, por njëkohësisht edhe sistemit të dobët të kontrolleve. Z.Alban Zusi, sipërmarrës në fushën e përpunimit ushqimor kërkoi që drejtuesit teknikë të kenë më shumë përgjegjësi lidhur me sigurinë e ushqimit. Ndërsa Znj. Antonela Hako, kryetare e Dhomës Ekonomike të Gruas tha se kompania e saj dhe shumë kompani të tjera po punojnë me standardet europiane të sigurisë, por kjo kërkohet të aplikohet edhe nga sipërmarrje të tjera. Problemet e konkurrencën u theksuan edhe nga përfaqësuesja e kompanisë Lufra, Antoneta Ndreka dhe Valbona Begolli drejtuese e AlbGroup. Të vetëdijshëm se kompanitë e mëdha duhet ta udhëheqin ndryshimin pozitiv drejt rritjes së standardeve, ato kërkojnë mekanizma për ta zhvilluar sa më lehtë këtë proces.
Krahas rritjes së kontrolleve higjieno-sanitare në të gjitha sipëmarrjet dhe aktorët e përfshirë në sektorin ushqimor, ato ranë dakord së bashku me drejtues të universiteteve se duhet të zgjerohet edukimi i konsumatorit. Dekani i Fakultetit të Mjeksisë Ilir Alimehmeti pranoi se Fakulteti i Mjekësisë është në nivelet e një kimie të thelluar, pa vëmendje në fushën e nutricionit. Ndërkohë, në Universitetin Bujqësor të Tiranës, ka disa kurrikula në sektorin e ushqimit, përfshirë nutricionin, por sipas tij kërkohen më shumë programe.
Lexo: Ndryshimet klimatike po ndikojnë edhe për supermarketin
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
