Inteligjenca Artificiale nuk është më një premtim për të ardhmen, ajo po ndodh tani. Nga mënyra si kompanitë marrin vendime, deri te mënyra si studentët mësojnë, AI po riformëson çdo aspekt të jetës sonë profesionale. Në këtë revolucion digjital, një nga zërat më të qartë dhe me ndikim në rajon është Ivica Peshovski, lider në zhvillimin e softuerit, edukator dhe entuziast i AI-së, që prej më shumë se një dekade ndërthur teknologjinë me lidershipin dhe arsimin. Si CTO i Brainster dhe profesor në Brainster Next College, ai është në pararojë të zhvillimit të platformave inteligjente ed-tech dhe të aplikimit praktik të inteligjencës artificiale në biznes dhe arsim.
Në Konferencën e 8-të Rajonale për E-commerce në Shkup, Ivica do të mbajë fjalimin e tij kryesor me temën “Future-Proofing Your Business with Autonomous AI Agents”, duke ndarë mënyrat praktike se si kompanitë mund të përfitojnë nga agjentët autonomë të AI-së për të ndërtuar biznese më efikase dhe elastike ndaj së ardhmes. “AI tashmë po ndryshon mënyrën se si punojmë, mësojmë dhe marrim vendime,” shprehet Ivica. Në sektorin e biznesit, ndikimi më i madh vjen nga automatizimi dhe mbështetja në vendimmarrje – sisteme që gjenerojnë raporte, analizojnë të dhëna, komunikojnë në mënyrë automatike dhe zbulojnë anomali më shpejt se çdo njeri. Kjo jo vetëm kursen kohë e kosto, por ul rrezikun dhe rrit efikasitetin.
Në arsim, ndikimi është edhe më thelbësor: personalizimi. “AI po e bën të mundur për herë të parë që çdo student të ketë përvojën e një mësuesi individual,” thekson ai. Duke analizuar mënyrën e të nxënit, angazhimin dhe ritmin e çdo studenti, sistemet inteligjente arrijnë të përshtatin materialet dhe metodat sipas nevojave të tyre. “Automatizimi po e bën biznesin më efikas, ndërsa personalizimi po e bën arsimin më njerëzor,” shton ai. Agjentët autonomë janë sisteme të pavarura që perceptojnë mjedisin, marrin vendime dhe veprojnë për të arritur qëllime specifike – pa pasur nevojë për mbikëqyrje të vazhdueshme njerëzore. “Këta agjentë janë kombinim i modeleve të mëdha gjuhësore me mjete, memorie dhe aftësi për arsyetim,” shpjegon Peshovski. “Në vend që një punonjës të përgatisë manualisht raporte, t’i analizojë dhe t’i dërgojë, një agjent autonom mund ta bëjë vetë – madje edhe të propozojë hapat e ardhshëm.” Sipas tij, bizneset që i adoptojnë herët këto sisteme do të kenë përparësi të jashtëzakonshme në shpejtësi, efikasitet dhe përshtatshmëri.
lexo edhe: Shqipëria, në krye të listës së vendeve të rrezikuara nga turizmi masiv
Sipas Peshovskit, sfidat kryesore që kompanitë hasin nuk janë teknologjike, por strategjike dhe organizative. “AI funksionon më mirë kur proceset janë të strukturuara dhe të standardizuara,” thotë ai. Nëse çdo departament punon ndryshe ose ndryshon vazhdimisht, agjentët autonomë e kanë të vështirë të funksionojnë. Një tjetër pengesë është mospërgatitja digjitale – kompani që ende përdorin dokumente të printuara dhe miratime me dorë, janë të papërgatitura për të përfituar nga AI.
Por ndoshta më e rëndësishmja është faktori njerëzor: “Ekipet duhet ta shohin AI-në si bashkëpunëtor, jo si zëvendësues. Kur e kuptojnë këtë, hapet rruga për kreativitet dhe inovacion.”
Për Peshovskin, edukimi duhet të shkojë përtej përdorimit të AI-së: “Që studentët të bashkëpunojnë me sisteme inteligjente, duhet të kuptojnë logjikën dhe strukturën mbi të cilën ato janë ndërtuar.”
Ai thekson rëndësinë e të menduarit kritik dhe bazave solide teknike, që u japin profesionistëve të ardhshëm aftësinë të përshtaten dhe të udhëheqin ndryshimin.
“Pa këto baza, përdorimi i AI-së është si të ngasësh një makinë autonome pa e ditur çfarë bën timoni,” shton me humor.
Në 3–5 vitet e ardhshme, Peshovski beson se do të shohim një bum të madh në automatizimin përmes agjentëve të AI – sisteme që nuk thjesht ndihmojnë, por veprojnë në mënyrë të pavarur, duke optimizuar flukset e punës nga fillimi deri në fund.
Për startup-et dhe bizneset në Ballkanin Perëndimor, ai jep një këshillë të qartë:
“Filloni me strukturë dhe digjitalizim. Zgjidhni një problem real për të adresuar, mos eksperimentoni kudo. Qëllimi nuk është të përdorni AI për modë, por për ta bërë të padukshme – që të merret me rutinën, ndërsa njerëzit fokusohen tek krijimtaria dhe strategjia.”
Ivica Peshovski do të jetë ndër folësit kryesorë në 8th Regional E-commerce Conference, duke sjellë perspektivën e një eksperti që beson se AI nuk po na zëvendëson – po na ndihmon të bëhemi më njerëzorë dhe më të mençur në mënyrën si punojmë dhe mësojmë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
