Lajmi për një serum që rikthen flokët e humbur për vetëm 20 ditë ka shkaktuar dy lloj reagimesh: disa e shohin me dyshim, të tjerë duan ta provojnë menjëherë. Por kjo formulë, e mbështetur në kërkim shkencor dhe eksperimente reale, po bën që shumë të çuditen me rezultatet që tregon, me rritjen e flokëve të rinj që mund të shihen me sy.
Së fundmi, studiuesit në Universitetin Kombëtar të Tajvanit kanë krijuar një serum inovativ për t’u aplikuar në lëkurë, i cili rikthen rritjen e flokëve. Në eksperimentet laboratorike, serumi rigjeneroi folikulat e flokëve duke stimuluar qelizat dhjamore në lëkurën e kokës. Po, e lexuat mirë! Serumi përbëhet nga acide yndyrore natyrale që nuk irritojnë lëkurën, dhe sipas ekspertëve, mund të dalë së shpejti në treg si produkt i lirë për përdorim pa recetë. Nëse po pyesni nëse ky pretendim është i vërtetë, dijeni që vetë autorët e studimit e kanë testuar. Profesori Sung-Jan Lin, autor i studimit në Universitetin Kombëtar të Tajvanit, tha se e ka provuar versionin e parë të serumit mbi këmbët e tij. “Unë personalisht aplikova këto acide yndyrore, të tretura në alkool, në kofshët e mia për tre javë dhe vura re rritje të flokëve,” – tha ai për New Scientist.
Ajo që e bën këtë serum unik është procesi mbi të cilin bazohet: hipertrikoza, një gjendje ku irritimi apo dëmtimi i lëkurës nxit rritje të tepërt të flokëve. Profesori Lin dhe ekipi i tij përdorën këtë parim për të zhvilluar formulën. Edhe pse njerëzit, për shkak të evolucionit, kanë humbur pjesën më të madhe të qimeve në trup, studimet tregojnë se ende ruajmë “aftësinë rigjeneruese” për t’i prodhuar ato. Në laborator, ekipi shkaktoi një formë të lehtë ekzeme tek minjtë, duke përdorur një përbërës të quajtur sodium dodecyl sulfate (SDS). Brenda 10–11 ditësh, në lëkurën e tyre filluan të rriteshin flokë të rinj me diametër rreth një milimetër. Ndërkohë, në zonat që nuk u trajtuan me irritues, nuk u vu re asnjë rritje flokësh.
Lexo edhe:Mirel Salija dhe 25 vitet që ndërtuan historinë e reklamës në Shqipëri!
Sipas studiuesve, irrituesi bën që qelizat imunitare të lëvizin drejt shtresës së dhjamit nën lëkurë. Aty ato nxisin qelizat dhjamore të çlirojnë acide yndyrore, të cilat më pas përthithen nga qelizat burimore të folikulave të flokëve, duke nxitur rritjen. “Këto rezultate tregojnë se dëmtimi i lëkurës nuk shkakton vetëm inflamacion, por gjithashtu stimulon rigjenerimin e flokëve,” – thuhet në artikullin e tyre të publikuar në Cell Metabolism. Për të analizuar efektin e acideve yndyrore pa përdorur irritues kimikë, studiuesit krijuan versione të ndryshme të serumit, të përbëra nga acide yndyrore natyrale si acidi oleik dhe acidi palmitoleik, të tretura në alkool. Edhe këto treguan rezultate pozitive në stimulimin e rritjes së flokëve. “Acidet oleike dhe palmitoleike janë acide yndyrore natyrale. Ato gjenden në indet tona dhjamore, por edhe në shumë vajra bimore, prandaj janë të sigurta për përdorim,” – sqaroi profesori Lin. Ekipi tashmë ka patentuar serumin dhe synon të kryejë testime të dozave të ndryshme në lëkurën e kokës së njerëzve përpara se ta nxjerrë në treg.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
