Ajo që nis si një mënyrë e pafajshme për t’u çlodhur pas një dite të gjatë, mund të kthehet në një shenjë alarmi për izolim social. Një studim i ri shkencor hedh dritë mbi një realitet shqetësues: njerëzit që zhvillojnë varësi nga binge-watching janë shumë më të prirur të ndihen të vetmuar.
Studimi, i publikuar në revistën PLOS One, sugjeron se për një pjesë të shikuesve, serialet televizive nuk janë më thjesht argëtim, por një arratisje emocionale nga mungesa e lidhjeve sociale reale.
Studiuesit Xiaofan Yue dhe Xin Cui nga Universiteti Huangshan në Kinë analizuan të dhënat e 551 të rriturve që konsumonin sasi të larta televizive – mbi 3.5 orë në ditë dhe më shumë se katër episode në javë. Rezultatet janë tronditëse: më shumë se 60% e tyre plotësonin kriteret për varësi nga binge-watching, një gjendje e shoqëruar me obsesion, rritje të pakontrolluar të shikimit dhe pasoja negative në punë, marrëdhënie dhe jetën e përditshme.
Por elementi më shqetësues ishte lidhja e fortë mes kësaj varësie dhe vetmisë. Tek personat e varur, ndjenja e izolimit social rezultoi dukshëm më e lartë, ndërsa kjo lidhje nuk u vu re tek shikuesit e shumtë që nuk shfaqnin shenja varësie. Sipas studiuesve, kjo tregon se binge-watching-u problematik nuk është thjesht çështje kohe përpara ekranit, por një simptomë e thellë emocionale.
Lexo edhe: OBSH alarmon: Proshuta, sallamat e virshllet rrisin rrezikun nga kanceri
Arratisje nga realiteti dhe kërkim ngushëllimi
Studimi identifikon dy arsye kryesore pse njerëzit e vetmuar bien në binge-watching: arratisjen nga emocionet negative dhe kërkimin e përforcimit emocional. Në mungesë të kontakteve njerëzore, serialet shndërrohen në shoqëri të heshtur, që ofron ngushëllim të përkohshëm, por nuk e zgjidh problemin.
Ky zbulim vjen në një kohë kur Organizata Botërore e Shëndetësisë (OBSH) paralajmëron se vetmia po shndërrohet në një kërcënim serioz për shëndetin global. Sipas OBSH-së, rreth 16% e popullsisë botërore vuan nga vetmia, një fenomen i lidhur me rrezik më të lartë për depresion, ankth, sëmundje të zemrës dhe diabet të tipit 2.
Edhe pse studiuesit theksojnë se studimi nuk provon një lidhje shkak–pasojë dhe fokusohet vetëm në televizion, jo në platformat e tjera digjitale, mesazhi është i qartë: ekranet mund të mbushin kohën, por jo boshllëkun emocional.
“Ky studim tregon se varësia nga binge-watching parashikohet ndjeshëm nga vetmia, ndërsa arratisja dhe përforcimi emocional shërbejnë si mekanizma rregullimi të emocioneve,” theksojnë autorët.
Sipas tyre, reduktimi i vetmisë dhe forcimi i lidhjeve sociale reale mund të jenë çelësi për të frenuar këtë formë të re varësie, që po përhapet në heshtje në shoqërinë moderne.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
