Sërish në konsultim publik ligji për kanabisin mjekësor - Business Magazine Albania

Sërish në konsultim publik ligji për kanabisin mjekësor

Qeveria ka rihedhur sërish për konsultim publik projektligjin për kultivimin e kanabisit për qëllime mjekësore, një nga nismat më të debatuara që në lançimin e saj. Mbyllja e konsultimit të parë të projektligjit ishte parashikuar në gusht, por ekzekutivi e ka rikthyer sërish atë duke marrë më shumë kohë për shqyrtimin e tij.

Drafti parashikon që subjektet që do të pajisen me një licencë duhet të kenë edhe një tjetër të ngjashme në një vend tjetër të OECD-së si dhe zotërues të GMP, praktika e mirë e prodhimit të lëshuara nga EMA ose FDA, Agjencia Amerikane për Ushqim dhe Barnat.

Për këtë qëllim do të krijohet edhe Agjencia Kombëtare e Kontrollit dhe Monitorimit të Kultivimit e Përpunimit të Kanabisit, me strukturë që do të miratohet nga kryeministri.

Pjesë e saj do të jetë Komisioni i Licencave që në përbërjen e tij do të ketë përfaqësues nga Ministria e Shëndetësisë, organet e larta të sigurisë publike, bujqësisë dhe ekonomisë.

Lexo edhe: Legalizimi i kanabisit mjekësor. Qeveria bën gati projektligjin, kushtet për kompanitë

Licencat do të jepen për një periudhë 15-vjeçare, vetëm për subjektet që plotësojnë kriteret e përcaktuara në ligj. Aktivitetet e përfshira në këtë licencë nuk mund të transferohen te të tretët, me përjashtim të atyre të lejuara në përshkrimin e saj.

Sipërfaqja totale e lejuar për kultivimin e kanabisit për qëllime mjekësore nuk mund të jetë më e madhe se 150 hektarë në nivel kombëtar, ndërsa e njësisë së licencës së dhënë nga 5 deri në 10 hektarë.

Kushtet e licencës sipas projektligjit do të rivlerësohen çdo 3 vjet nga Agjencia përkatëse, ndërsa kontrolli e monitorimi i prodhimit apo tregtimit të kanabisit do të bëhet nga një njësi e specializuar brenda saj.

Drafti parashikon edhe ndëshkim me gjobë deri në ndalim të kryerjes së veprimtarisë për shkelje dhe kundravajtje të rënda.

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #30 - Nëntor 2022
Shiko më shumë
Na ndiqni në rrjetet sociale
0