Rreth 100 milionë euro investime për energji të ripërtëritshme në Vushtri

Në prani  të Ambasadorit të Republikës së Francës z. Didier Chabert, në zyrën e Kryetarit të Vushtrisë Xhafer Tahiri, u nënshkrua Memorandumi i Mirëkuptimit mes Komunës së Vushtrisë dhe Çiçavica Wind Farm 1 L.L.C, (projekt i kompanisë franceze Akou Energy).

Projekti Çyçavica wind Farm ka për qëllim prodhimin e energjisë së ripërtëritshme nga era. Vlera e investimit është rreth 100 milionë euro. Nga ky projekt do të përfitojë Komuna e Vushtrisë dhe Kosova. Projekti synon të prodhojë rreth 100 MW/h energji elektrike nga era ku në malin e Çyçavicës do të vendosen deri në 17 turbina për prodhim të energjisë së erës.

Në bazë të këtij memorandumi Komuna e Vushtrisë do të përfitojë:

• Të ardhura direkte nga projekti që korrespondon në vlerën 1% të të ardhurave vjetore të projektit Çyçavica Wind Farm;
• Bursa studimi në Francë për studentët që vijnë nga komuna e Vushtrisë dhe studentët nga e gjithë Kosova në fushën e energjisë së ripërtëritshme, ku Ambasada Franceze në Prishtinë do të angazhohet dhe do të ndërmjetësojë për këtë qëllim;
• Subvencionim të Organizatave joqeveritare lokale për të zhvilluar turizmin energjetik në Malin e Çycavicës.

Kryetari i Vushtrisë Xhafer Tahiri tha që ky është një moment tepër i rëndësishëm për zhvillimin e Vushtrisë dhe të Kosovës. “Ne jemi të përkushtuar dhe të hapur për investitor të huaj që do të nxisin zhvillimin ekonomik të qytetit tonë. Ky do të jetë investimi më i madh privat në Vushtri, ndërsa Komuna mbetet e përkushtuar që në një proces transparent të mbështesë investimin”.

Ambasadori i Francës në Kosovë z. Chabert theksoi që kompania Akou Energy është lidere në Europë në fushën e energjisë së ripërtëritshme dhe ky memorandum sot tregon për seriozitetin e këtij investimi.

Emil Bakic, Drejtor për Ballkanin i Akou Energy theksoi vlerën e këtij investimi duke kujtuar se projekte të ngjashme janë zhvilluar në Mal të Zi dhe në Kroaci.

/Komuna e Vushtrrisë.