Ministrja e Ekonomisë dhe Inovacionit, Delina Ibrahimaj, deklaroi ditën e sotme se nga monitorimet e kryera në treg nuk është vërejtur rritje e përgjithshme e çmimeve, por vetëm në kategorinë e perimeve, për të cilën qeveria parashikon ndërhyrje me subvencione për shtresat në nevojë.
Sipas saj, që prej mesit të marsit është vërejtur një rritje e çmimeve të frutave dhe perimeve, ndërsa produktet e tjera të shportës nuk kanë shënuar ndryshime. Ajo theksoi se situata po monitorohet në baza ditore dhe se inflacioni në mars ka qenë në nivelin 2.6%, duke e konsideruar të kontrolluar.
Ibrahimaj shtoi se qeveria do të ndërhyjë me mbështetje financiare për familjet me të ardhura të ulëta në rast se rritjet e çmimeve vijojnë, duke theksuar se efektet e krizave ndërkombëtare po mbeten të kufizuara në ekonominë shqiptare.
Duke folur për çmimet e karburanteve, ministrja u shpreh se qëllimi i Bordit të Transparencës është të shmangë rritjet spekulative në treg. Ajo konfirmoi se nuk parashikohet ulje e taksës së qarkullimit, ndërsa akciza do të reduktohet me 20% vetëm kur çmimi i karburantit kalon nivelin 220 lekë.
Në të njëjtën deklaratë, Ibrahimaj bëri të ditur se në projektligjin e ri për tatimin mbi të ardhurat parashikohet që shqiptarët ose rezidentët tatimorë në Shqipëri që gjenerojnë të ardhura jashtë vendit të mos tatohen brenda vendit.
Sipas saj, ndryshimi synon të nxisë kthimin e diasporës dhe të tërheqë pensionistët që jetojnë jashtë, në kuadër të ashtuquajturës “ekonomi e argjendtë”. Po ashtu, projektligji parashikon përjashtim nga tatimi për personat e verbër si pjesë e lehtësirave fiskale sociale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
