Nga Valer Pinderi- Unë jam Valer Pinderi, President i Shoqatës Shqiptare të eCommerce (AECA), dhe doja të ndaja me ju një zhvillim të rëndësishëm për sektorin e tregtisë online në Shqipëri. Në bashkëpunim me Ministrinë e Ekonomisë dhe Financave (MEKI), ne kemi nënshkruar një plan veprimi të ri, i cili nuk është thjesht një dokument, por një mekanizëm konkret për të përmirësuar performancën tonë në shitjet elektronike dhe për të krijuar një urë të qëndrueshme komunikimi me institucionet kryesore të vendit.
Ky plan mbledh rreth një tryeze Bankën e Shqipërisë, Shoqatën e Bankave, Drejtorinë e Tatimeve, Drejtorinë e Doganave, Postën Shqiptare, AKEP-in, AIDA-n dhe një sërë aktorësh të tjerë kyç, me qëllimin e përbashkët: adresimin e situatës kritike ku ndodhet industria e internetit, si dhe rritjen e mundësive e leverdishmërisë për të gjithë bizneset shqiptare që operojnë në tregtinë online.
Marrëveshja e re për Planin e Veprimit të Tregtisë Elektronike, e firmosur së fundmi nga Ministria e Ekonomisë, Kulturës dhe Inovacionit (MEKI), përfaqëson një hap domethënës në sinkronizimin e veprimeve mes institucioneve shtetërore dhe sektorit privat. Ky plan synon të krijojë një mjedis sa më miqësor për tregtinë online, duke ndihmuar bizneset e vogla dhe të mesme, si dhe gjithë aktorët e tjerë në ekosistemin e e-commerce.
Në thelb, dokumenti parashikon disa masa kyçe, mes të cilave:
- Forcimi i kuadrit ligjor dhe fiskal, për të mbështetur transaksionet elektronike e për të rritur besimin e konsumatorit.
• Krijimi i kushteve më të mira logjistike, përfshirë lehtësimin e procedurave doganore dhe postare, në mënyrë që produktet të lëvizin më shpejt dhe më sigurt.
• Zhvillimi i platformave për të rritur transparencën e të dhënave, si dhe për të mbrojtur të drejtat e konsumatorit e të biznesit.
• Analiza dhe promovimi i praktikave më të mira për sigurinë kibernetike e pajtueshmërinë me standardet ndërkombëtare.
• Nxitja e përdorimit të pagesave elektronike dhe edukimi financiar i konsumatorëve.
Përgjatë 2025-ës fokusin e kemi të zgjerojmë anëtarët me qëllim që mendimi ynë të jetë sa më gjithë përfshirës.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
