Në spitalin Molinette, pjesë e kompleksit “Città della Salute e della Scienza” në Torino, është realizuar një transplant i jashtëzakonshëm i mëlçisë tek një vajzë 21-vjeçare, e cila u shpëtua falë një teknike krejtësisht të re dhe të padëgjuar më parë, një ndërhyrje plotësisht ekstra-anatomike, ku mëlçia e re u lidh me trupin në mënyrë krejt të ndryshme nga procedurat tradicionale.
Tre “kanalet” kryesore që zakonisht përdoren për të bashkuar mëlçinë me trupin; vena porta, arteria hepatike dhe kanali biliar nuk ishin më funksionale. Vajza ishte lindur me një keqformim të rëndë të quajtur atrezia e rrugëve biliare, një gjendje që kërkoi një transplant të parë të mëlçisë në moshën më pak se gjashtë muajshe, gjithashtu i kryer në të njëjtin spital, në Qendrën për Transplantin e Mëlçisë. Fatkeqësisht, gjatë adoleshencës, vajza nisi të përjetonte infeksione të vazhdueshme të tëmthit që preknin mëlçinë e mëparshme të transplantuar, duke çuar me kohë në cirrozë të rëndë, një formë e avancuar e dëmtimit të mëlçisë.
Pasi u hoq mëlçia e dëmtuar, mjekët u përballën me një sfidë madhore: asnjë nga pikat tradicionale të lidhjes së organit nuk ishte më e përdorshme. Për të siguruar furnizimin me gjak arterial, ata lidhën drejtpërdrejt aortën abdominale të pacientes me arterien e mëlçisë së re. Për të zëvendësuar funksionin e venës portale, u përdor një teknikë e quajtur “transpozicion kavo-portal”: vena kava inferiore u pre dhe u bashkua me venën porta të mëlçisë së dhuruar.
Lexo edhe: Studimi: Stili i jetës pas të 50-ave faktor kyç për jetëgjatësinë
Operacioni, i cili zgjati rreth 14 orë, u drejtua nga profesori Renato Romagnoli me ekipin e tij, në bashkëpunim me anestezistët e repartit Anestezi & Reanimacion 2 (të udhëhequr nga Dr. Maurizio Berardino) dhe me kardio-kirurgët dhe perfuzionistët e departamentit të Kardio-Kirurgjisë të profesorit Mauro Rinaldi. Gjatë një faze delikate të operacionit, për rreth 80 minuta, u përdor një makineri jashtë-trupore për të ruajtur funksionin e qarkullimit të gjakut.
Pas pesë ditësh në terapi intensive, vajza tani është në gjendje të mirë dhe po ndjek një proces të kujdesshëm rikuperimi në repartin gjysmë-intensiv kirurgjikal – një dëshmi e kurajos, inovacionit dhe bashkëpunimit multidisiplinar që i dha asaj një jetë të dytë.
Burimi: TgCom24
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
