Tirana po shndërrohet me shpejtësi në një qendër dinamike për startup-et dhe inovacionin teknologjik. Një nga momentet kyçe që e konfirmon këtë prirje është investimi i sapo siguruar nga Patoko, platforma me rritjen më të shpejtë për lëvizshmërinë dhe rezervimin e shërbimeve online. Ky investim vjen nga fondi K4S6 i sipërmarrësit shqiptaro-amerikan, Kevin Sekniqi, dhe shënon një pikë kthese për ekosistemin e startup-eve në Shqipëri. K4S6 është një nismë e Sekniqit, e lançuar vitin e kaluar, që synonte të identifikonte dhe mbështeste startup-et me potencial të lartë në Shqipëri. Pas një procesi të gjatë përzgjedhjeje dhe takimesh me themelues vendas, Patoko u dallua si startup-i i parë që siguroi mbështetjen e K4S6.
Kevin Sekniqi është një emër i njohur në teknologjinë globale. Me eksperiencën e tij të suksesshme në industrinë e blockchain dhe jo vetëm, Sekniqi ka identifikuar në Patoko një potencial të madh për transformimin e tregut të shërbimeve digjitale në Shqipëri dhe më gjerë.
“Ekosistemi i startup-eve në Shqipëri po hyn në një epokë të re,” deklaron Kevin Sekniqi, themelues i K4S6. “Ne morëm kohën e duhur për të analizuar tregun, për të kuptuar klimën e biznesit dhe për të identifikuar se ku mund të sjellim ndikimin më të madh. Patoko u veçua për ekzekutimin e tij të shkëlqyer, planet ambicioze të rritjes dhe një ekip ndërkombëtar të fortë. Ky është lloji i startup-eve që mund të shkallëzohen me shpejtësi me mbështetjen e duhur.”
Rreth K4S6: Investimi në të ardhmen e inovacionit
K4S6 është një inkubator dhe fond investimi i themeluar nga Kevin Sekniqi, i dedikuar për mbështetjen e startup-eve në Shqipëri dhe më gjerë. Fondi ofron financime midis 25,000 dhe 250,000 dollarë për startup, duke u fokusuar te bizneset me ndikim të lartë dhe potencial për tu shkallëzuar e shtrirë në tregjet globale.
Sekniqi, i njohur si një nga inovatorët kryesorë të blockchain, ka qenë pjesë e Forbes 30 Under 30 dhe bashkëthemelues i Ava Labs, një prej kompanive më të suksesshme të teknologjisë blockchain në botë. Përmes K4S6, ai synon të ndërtojë ura mes skenës shqiptare të startup-eve dhe ekosistemeve ndërkombëtare të kapitalit sipërmarrës.
Si Patoko po riformëson tregun
Patoko nuk është thjesht një aplikacion për taksi. Ai ka evoluar në një “super aplikacion”, duke ofruar një gamë të gjerë shërbimesh për nevojat e përditshme të shqiptarëve. Nga rezervimi i udhëtimeve dhe shërbimeve deri tek mundësimi i pagesave digjitale duke mundësuar më shumë qasje në shërbime të personalizuara, Patoko po sjell një revolucion në mënyrën se si njerëzit lëvizin dhe ndërveprojnë me shërbimet lokale.
Patoko u mundëson përdoruesve të:
✔ Rezervojnë një udhëtim me taksi me një klikim
✔ Porosisin shërbime për shtëpinë si pastrimi dhe shërbime hidraulike
✔ Bëjnë rezervime për kujdes personal në sallone estetike dhe parukeri
✔ Përfitojnë shpërblime përmes një sistemi të integruar besnikërie
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
