Një epokë e re për fintech, Revolut bëhet zyrtarisht bankë në Britani

Platforma fintech Revolut ka arritur një moment historik në rrugëtimin e saj: kompania është bërë zyrtarisht bankë në Mbretërinë e Bashkuar. Entiteti i ri, Revolut Bank UK Ltd, është tashmë i autorizuar të ofrojë llogari bankare dhe të pranojë depozita nga klientët britanikë, duke e vendosur kompaninë në të njëjtin nivel rregullator me bankat tradicionale të vendit.

Banka e re do të mbikëqyret nga dy institucionet kryesore rregullatore të sistemit financiar britanik: Prudential Regulation Authority (PRA) dhe Financial Conduct Authority (FCA). Ky zhvillim do të thotë se Revolut do të operojë sipas të njëjtave standarde të rrepta që aplikohen për bankat e tjera në Mbretërinë e Bashkuar.

Një nga ndryshimet më të rëndësishme për klientët është mbrojtja e depozitave. Llogaritë e reja bankare do të mbulohen nga Financial Services Compensation Scheme (FSCS), e cila siguron depozitat deri në 120,000 paund për person për fondet e kualifikuara.

Kalimi gradual i klientëve në bankën e re

Në muajt e ardhshëm, Revolut planifikon të transferojë gradualisht klientët e kualifikuar në entitetin e ri bankar. Ky proces pritet të jetë i automatizuar dhe pa ndërprerje për përdoruesit.

Pavarësisht këtij ndryshimi të madh institucional, për shumicën e klientëve përvoja e përdorimit do të mbetet e njëjtë. Numri i llogarisë, IBAN, sort code dhe BIC nuk do të ndryshojnë, ndërsa aplikacioni Revolut do të vazhdojë të funksionojë si më parë, duke ruajtur historikun e plotë të transaksioneve.

Lexo edhe: Çfarë është Revolut dhe a është Shqipëria gati për bankat digjitale?

Mbrojtje më e madhe dhe produkte të reja

Statusi i ri bankar i jep Revolut mundësinë të ofrojë funksione më të avancuara bankare në të ardhmen. Kompania ka bërë të ditur se në muajt në vijim do të prezantojë produkte dhe shërbime të reja financiare për klientët britanikë.

Pas kalimit në bankë, depozitat e klientëve do të mbrohen nga FSCS deri në 120,000 paund për person për një gamë të gjerë llogarish, përfshirë llogaritë personale, llogaritë për të rinj Kids & Teens, llogaritë e përbashkëta dhe llogaritë profesionale.

Ndërkohë, balancat në shërbimin Savings do të vazhdojnë të menaxhohen nga Revolut Ltd dhe do të depozitohen në banka partnere, duke ruajtur mbrojtjen e FSCS për çdo bankë partner.

Shërbime të tjera të njohura të platformës – si tregtimi i aksioneve, kriptomonedhat dhe mallrat financiare – do të vazhdojnë të ofrohen nga entitete të veçanta brenda ekosistemit të Revolut dhe nuk do të mbulohen nga skema e sigurimit të depozitave të bankës së re.

Një moment kyç për fintech në Europë

Transformimi i Revolut nga një aplikacion fintech në një bankë të plotë në Mbretërinë e Bashkuar konsiderohet një moment i rëndësishëm për industrinë e teknologjisë financiare. Ai sinjalizon gjithashtu një fazë të re të konkurrencës midis bankave tradicionale dhe platformave digjitale që po fitojnë gjithnjë e më shumë terren në tregun global të financave.