Në qytetin e vogël të Manhattan, Kansas, i njohur ndryshe si “Molla e Vogël”, një grua e quajtur Amber Starling arriti të ndërtojë një biznes fitimprurës prej rreth 500,000 dollarësh në vit, vetëm me 100 dollarë, një fshesë me korrent dhe një ide të qartë, të mos presë më që dikush ta punësojë.
Lexo gjithashtu: Startup-i i Elon Musk, Neuralink, arrin vlerën 9 miliardë dollarë
Kur përvoja “e tepërt” u kthye në pengesë
Pasi u zhvendos në Kansas në vitin 2017, Amber erdhi me 5 vite përvojë menaxheriale, përfshirë punën në zjarrfikësinë vullnetare, dhe 7 vite përvojë në zyrë. Por, ajo u përball me një realitet zhgënjyes, tregu i punës e konsideronte ose shumë të kualifikuar, ose me pak arsimim formal. Pas 7 muajsh kërkimi të pafrytshëm, vendosi të marrë frenat në duar dhe të punësojë veten.
Një fushatë në Facebook dhe një emër me magji
Amber nisi “Good Witch Cleaning” me 100 dollarë të kursyera nga buxheti i ushqimeve, të cilat i shpenzoi për pastrues të thjeshtë nga një dyqan me ulje. E pagëzoi kompaninë me një emër të frymëzuar nga afërsia me muzeun “Wizard of Oz”, një vendim i zgjuar nga pikëpamja e marketingut, që e ndihmoi të dallojë menjëherë.
Klientët e parë i gjeti përmes një oferte prej 99 dollarësh për pastrim të të gjithë shtëpisë, që e shpërndau në Facebook. Nuk kishte siguracion në fillim, por sinqeriteti dhe korrektësia i fituan zemrën klientëve.
Nga vetëpunësimi te ndërtimi i një ekipi
Brenda një viti, Starling punësoi punonjësin e saj të parë, duke e kthyer një shërbim të zakonshëm në një strukturë profesionale me trajnime dhe certifikime. Ajo dhe pjesa më e madhe e stafit mbajnë certifikatën IICRC për teknikë të pastrimit të shtëpive, një trajnim që përfshin kimikate, siguri dhe mirëmbajtje të materialeve.
“Kushdo mund të thotë: ‘Po sikur të largohen dhe të marrin gjithë këtë njohuri me vete?’ Por unë pyes: ‘Po sikur të qëndrojnë pa e pasur këtë njohuri?’” – thotë ajo.
Lexo gjithashtu: Think Big nis sezonin e tretë me historinë frymëzuese të superApp-it të parë shqiptar – Patoko
Vlera njerëzore para fitimit
Biznesi nuk e humbi busullën as në kohët më të vështira. Gjatë pandemisë, humbën 60% të klientëve brenda natës, por Amber nuk u dorëzua. Ajo rishpërndau fondet nga një grant për të siguruar certifikime në dezinfektim dhe sanitet, vendim që rezultoi jetik.
Për më tepër, ajo vendosi që “Good Witch Cleaning” të jetë një kompani që reflekton vlerat e saj personale: feministe, mbështetëse e komunitetit LGBTQIA+, miqësore ndaj emigrantëve, dhe e përkushtuar ndaj drejtësisë sociale.
Në një kohë kur shumë kompani përpiqen të zgjerojnë fitimin duke ulur kostot, Starling bëri të kundërtën, punonjësit e saj marrin pagë jetese, kanë akses në kujdes shëndetësor, shëndet mendor, pushime të paguara dhe trajnim të vazhdueshëm.
Rritje e qëndrueshme, jo me çdo kusht
Të ardhurat e “Good Witch Cleaning” janë rritur në mënyrë të qëndrueshme:
-
2017: $11,000
-
2018: $57,000
-
2019: $119,000
-
2020: $216,000
-
2021: $467,000
Amber vendosi të mos ndjekë një rrugë ekspansioni agresiv. Ajo qëndroi e fokusuar në pastrimin rezidencial dhe në familjet punëtore dhe të klasës së mesme, për t’i shërbyer realisht komunitetit.
Jep më shumë sesa merr
Biznesi i saj ka ndihmuar në emergjencat lokale, ka donuar për ekipe sportive, për organizata si True Colors (qendër për të rinjtë LGBTQ), dhe madje ka hapur një dyqan falas në ambientet e zyrës së saj, ku njerëzit mund të marrin ose dhurojnë sende të përdorura në gjendje të mirë.
Amber ka lindur dhe është rritur nën kufirin e varfërisë në Jugun e thellë të SHBA-s, një përvojë që e ka formuar në rrënjë. Ajo e di se talenti dhe zgjuarsia nuk mungojnë në shtresat e punës, ajo që mungon është mundësia.
Mesazhi i saj për të tjerët është i qartë: Nuk ke nevojë të jesh një korporatë e madhe për të ndërtuar një biznes të suksesshëm. Ke nevojë të jesh njeri dhe të kujdesesh për të tjerët.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
