Evropa dhe mbarë bota u tronditën ditën e djeshme ndëra presidenti amerikan Donald Trump njoftoi vendosjen e një sërë tarifash të reja doganore për mallrat që futen në SHBA nga BE, Azia, Australia etj. Ky vendim i adminsitratës Trump preku edhe Shqipërinë dhe Kosovën, ku mallrat tona që eksportohen përtej Oqeanit do të tarifohen në masën 10%. Ky vendim është pjesë e një politike të gjerë tregtare, e cila synon të rishikojë balancat ekonomike mes SHBA-së dhe partnerëve të saj ndërkombëtarë.
Businessmag pyeti në lidhje me këtë zhvillim të rëndësishëm që pritet të ndikojë marrëdhëniet tregtare Shqipëri- SHBA, Grant Van Cleve, President i Dhomës Amerikane të Tregtisë në Shqipëri.
‘’Duke folur në mënyrë personale, si Grant Van Cleve, besoj se Shqipëria duhet ta konsiderojë këtë situatë në një kontekst më të gjerë. Normat doganore të Shqipërisë janë më të ulëta se ato të Bashkimit Evropian dhe madje edhe më të ulëta se disa vende fqinje të Ballkanit—gjë që, sipas mendimit tim, pasqyron qëndrimin vazhdimisht pro-amerikan të Shqipërisë. Ky diferencim mund të shërbejë si simbol i orientimit tonë strategjik në peizazhin gjeopolitik në zhvillim.’’ – u shpreh Van Cleve.
Lexo edhe: Beteja e barnave: BE i shpëton përplasjes me SHBA-në, por mbetet në alarm
Sipas tij edhe nëse tensionet midis SHBA-së dhe BE-së do të vazhdojnë, statusi i Shqipërisë si një vend jo pjesë e BE-së mund të shihet si një avantazh.Van Cleve shprehet se SHBA-ja ka sinjalizuar një zhvendosje drejt forcimit të marrëdhënieve dypalëshe me partnerë më të vegjël dhe më fleksibël, dhe Shqipëria është në një pozicion shumë të mirë për t’u perceptuar si një aleat i besueshëm.‘’ Ne mund të bëhemi një qendër për investime amerikane, një partner i vërtetë gjeopolitik, ku SHBA-ja e sheh të arsyeshme të zgjerojë praninë e saj. Jam personalisht i përfshirë në disa iniciativa që reflektojnë këtë prirje. Projekte që dikur zhvilloheshin me ngadalësi tani po marrin përparësi në epokën Trump. Nëse ky ritëm vazhdon, Shqipëria mund të përjetojë një rritje domethënëse të PBB-së, dhe në këtë kontekst, një tarifë prej 10% do të ishte një kosto e vogël krahasuar me përfitimet më të mëdha ekonomike që mund të sjellë kjo periudhë.’’ – thekson ai.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
