Arritja e armëpushimit 2-javor mes SHBA-ve dhe Iranit duket se ka ndikuar në uljen e çmimit të naftës edhe në Shqipëri. Ditën e sotme Bordi i Transparencës ka vendosur çmimet e reja të karburanteve dhe nafta është ulur me 4 lekë.
Nga 224 lekë sa ishte më parë, nafta me pakicë do të lejohet të shitet tani jo më shumë se 220 lekë për litër. Ndërkohë, çmimi i benzinës mbetet i pandryshuar. Bordi ka përcaktuar tavanin e çmimeve si më poshtë:
Çmimi i shitjes me pakicë i nënproduktit gazoil, standardi SSH EN 590, nuk do të kalojë 220 lekë/litër, ndërsa ai me shumicë jo më shumë se 208 lekë/litër.
Çmimi i shitjes me pakicë i nënproduktit benzinë, standardi SSH EN, do të jetë deri në 181 lekë/litër, ndërsa me shumicë jo më shumë se 169 lekë/litër.
Lexo edhe: 14 ditë paqe mes SHBA dhe Iranit, rihapet Ngushtica e Hormuzit
Çmimet e reja do të hyjnë në fuqi sot në orën 15:30 dhe do të mbeten të vlefshme deri në mbledhjen tjetër, kur do të përcaktohen ndryshimet e reja të çmimeve të shitjes.
Bordi ka rikujtuar gjithashtu të gjithë operatorët e tregtimit të karburanteve, si me shumicë ashtu edhe me pakicë, që të respektojnë rigorozisht këtë vendim. Çdo shkelje mund të sjellë pezullim të aktivitetit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
