Që kur OpenAI prezantoi chatbot-in ChatGPT në nëntor 2022, dilema më e madhe dhe pyetja më e rëndësishme ka qenë ndikimi që do të kishte në vendet e punës. Pas ChatGPT, janë shfaqur shumë chatbot-e dhe mjete produktiviteti të bazuara në AI që potencialisht mund të zëvendësojnë njerëzit. CTO e OpenAI, Mira Murati, ka thënë se AI do të eliminojë me siguri një sërë vendesh pune. Dhe disa nga ato janë kryesisht role kreative.
Punët kreative kanë qenë ‘të rrezikuara’ që kur ChatGPT filloi të marrë përsipër detyra që zakonisht kryheshin nga njerëzit. Po ashtu, DALL-E, i cili mund të krijojë imazhe nga komandat e gjuhës natyrore, ka treguar se si AI mund të gjenerojë në mënyrë autonome prodhime kreative. Murati tha se teknologjia mund të shkaktojë zhvendosje të punëve në industrinë kreative. Megjithkëtë, ajo vuri në dyshim nëse këto punë ishin me të vërtetë të nevojshme për të qenë si pozicione pune të kryera nga një person. Murati së fundmi ka bërë një deklaratë në një intervistë për revistën Fortune.
Ekzekutivja e OpenAI nuk zbuloi se çfarë lloji punësh kreative ka të ngjarë të transformohen dhe zhvendosen nga AI. Thuhet se komentet e saj u bënë në një kohë kur industria e argëtimit po debatonte ndikimin e AI-së në aspekte të ndryshme të industrisë. Gjithashtu asokohe shumë skenaristë dhe aktorë kishin protestuar në kundër përdorimit të AI-së në Hollywood.
Në fakt, shumë punë freelance janë prekur tashmë nga implementimi në rritje i mjeteve të AI-së. Që kur ChatGPT dhe mjete të ngjashme dolën në pah, punësimet në disa faqe freelance janë ulur ndjeshëm. Sipas një raporti të Wall Street Journal, postimet për punë freelance janë reduktuar me 21% në faqe si Fiverr dhe Upwork.
Lexo edhe: Si të maksimizoni çdo orë të ditës tuaj për produktivitet të pandalshëm
Megjithatë, Murati pohon se mjetet e AI mund të jenë një mënyrë për t’u bërë më krijues. Ajo tha se AI, kur përdoret si një mjet për edukim dhe krijimtari, do të ndikojë pozitivisht për të zgjeruar inteligjencën, krijimtarinë dhe imagjinatën tonë. Sipas Murati, hapi i parë është të ndihmohen njerëzit të kuptojnë se çfarë janë të afta të bëjnë këto sisteme AI dhe si mund të integrohen në proceset e punës. “Çdokush në botë, madje edhe në zonat më të largëta, mund të ketë qasje në mësimdhënie të personalizuar sipas mënyrës së tyre të të menduarit, prejardhjes kulturore dhe interesave të tyre,” tha ajo.
Murati përmendi gjithashtu premtimin e AI të avancuar në kujdesin shëndetësor dhe arsim, si dhe aplikimet e mundshme në zgjidhjet e ndryshimeve klimatike. Kjo mund të nënkuptojë gjithashtu se AI mund të krijojë mundësi të reja ose të ndryshojë ato ekzistuese në këto fusha pune. Në të njëjtën intervistë, duke folur për ndikimin më të gjerë të AI, Murati tha se do të kërkonte shumë punë jo vetëm nga kompanitë që zhvillojnë dhe vendosin këto teknologji, por edhe nga palët e interesuara si shoqëria civile, media, qeveritë, rregullatorët dhe publiku i gjerë.
Pra ndërsa Mira Murati mendon se AI do të mbyllë disa role pune që konsideroheshin të panevojshme, por gjithsesi si një mjet për arsimim dhe kujdes shëndetësor, ai do të jetë gjithnjë shumë i nevojshëm dhe mund të çojë në rezultate pozitive.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
