Studentët e vitit të parë në programin Master në Shkenca Komunikim zhvilluan debatin publik me temë: “Media online, gazetari apo biznes?” Debati u organizua në kuadër të lëndës “Marketingu Politik Mjetet, Teknikat dhe Strategjitë”, duke u nisur nga metodat bashkëkohore të realizimit të lëndëve mësimore, si metoda jo-formale të të mësuarit, pavarësie të studentëve, si dhe të mësuarit duke u praktikuar.
Nisur nga projekti i lëndës, 8 studentët përfaqësues u ndanë në dy grupe për të mbrojtur tezën përkatëse.
Nën moderimin e studentes Donisa Perseku, grupi i parë me anëtarë Jani Sinjarin, Ervin Muçën, Sefer Çelën dhe Lorena Sançon, sollën argumentet pro medias online si gazetari e ditës së sotme. Ndërsa grupi i dytë me anëtarë Arjola Hajdinin, Anjeza Nokan, Qemal Shehun dhe Ermion Jahon mbrojtën idenë se mediat online janë shndërruar në biznes, të prirura të publikojnë lajme që klikohen më shumë, duke anashkaluar cilësinë e lajmit për të gjeneruar të ardhura.
BusinessMag e ndoqi nga afër këtë debat publik, e sigurisht duke përkrahur tezën se media online është gazetari. Një gazetari virtuale ku teknologjia është ndërmjetësi më i mirë që e shpërndan informacionin në kohë reale. Aty ku gazetarët janë të paanshëm dhe të lirë për të shprehur mendin e tyre, pa orare fikse dhe pa presionin e një strukture mediatike.
Juria e përbërë nga Dr. Erlis Çela, përgjegjës i Departamentit të Shkencave të Komunikimit, Doc. Dr. Agron Tufa, si dhe lektorja e lëndës Edlira Mali, vlerësuan mbi forcën e argumentit, prezantimit, kundër-argumentit, referencave dhe performancës së përgjithshme, duke shpallur fitues grupin ku Media Online ishte Gazetari.
Aktiviteti i zhvilluar në ambjentin e bibliotekës, me dekorin e Creative Event, debati u përmbyll me shpërndarjen e certifikatave për grupin fitues. Vlen për tu theksuar fakti që Universiteti Bedër vazhdimisht zhvillon aktivitete të kësaj natyre, gjithëpërfshirëse dhe zhvilluese për vet studentët e tij.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
